Թուրքիան ուշադիր հետևում է

Թուրքիան ուշադիր հետևում է Ֆրանսիայի կողմից Հայոց ցեղասպանության ժխտումը քրեականացնող օրինագիծը կրկին Սենատի օրակարգ մտցնելու վերաբերյալ զարգացումներին։ Այդ մասին հայտարարել է Թուրքիայի նախագահ Աբդուլլահ Գյուլը։ 

«Թուրքիան այդ մասին խոսակցություններով չի առաջնորդվում։ Ֆրանսիայի նախագահի հետ վերջին հանդիպման ընթացքում կարևորել ենք  երկրների միջև երկկողմ հարաբերությունների ամրապնդումը», – ասել է Գյուլը։

Նախօրեին ֆրանսիական մի շարք ԶԼՄ–ներ հաղորդել են, որ Հայոց ցեղասպանության ժխտումը քրեականացնող օրինագիծը կրկին Սենատի օրակարգ մտցնելու ֆրանսիացի պատգամավորների նախաձեռնությունը նորից ֆրանս–թուրքական հարաբերությունների վատթարացման առիթ է դարձել։ 

Օրինագիծը Սենատի օրակարգ մտցնելու վերաբերյալ տեղեկությունը, ըստ ֆրանսիական ԶԼՄ–ների, հաստատել են նաև Ելիսեյան պալատից։  

Թուրք–ֆրանսիական հարաբերությունները, որոնք սառեցվել էին Սենատի կողմից Հայոց ցեղասպանության ժխտումը քրեականացնող օրինագիծը ընդունելուց հետո, վերականգնվելու հույս է արթնացրել պաշտոնական Անկարայի մոտ Ֆրանսուա Օլանդի՝ Ֆրանսիայի նախագահ ընտրվելուց հետո։