Պայթյուն՝ լռության օրվա նախօրեին

Վերլուծական 7 Դեկտեմբեր, 2018 17:16

Վերաքննիչ քրեական դատարանում՝ նախագահությամբ դատավոր Ռուբիկ Մխիթարյանի, հրապարակվեց ՀՀ երկրորդ նախագահ Ռոբերտ Քոչարյանի նկատմամբ առաջին ատյանի դատարանի` կալանավորումը որպես խափանման միջոց ընտրելու մասին որոշման դեմ պաշտպանական կողմի բերած բողոքների վերաբերյալ որոշումը: Սա նշանակում է, որ Երկրորդ նախագահը կկալանավորվի: Նշենք, որ Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-րդ հոդվածի 1-ին մասով այն բանի համար, որ նա, այլ անձանց հետ նախնական համաձայնությամբ, տապալել է Հայաստանի Հանրապետության սահմանադրական կարգը: Այժմ պետք է հասկանալ, թե ինչպիսի հետևանքներ կարող է ունենալ դատարանի կայացրած որոշումը: Մի կողմից, իհարկե, էյֆորիայի բարձր մակարդակը ընտրություններից երկու օր առաջ ապահովված կլինի, հաշվի առնելով, թե ինչպիսի հանրային ուշադրություն կար Քոչարյանի դատական գործի նկատմամբ:

Թեև հասկանալի է, որ իշխանությունները շտապում էին, այնուամենայնիվ, շտապողականությունը կարող է աշխատել հենց նրանց դեմ՝ Քոչարյանի պաշտպանական թիմը կարող է սկսել թմբկահարել քաղաքական հաշվեհարդարի, քաղաքական հետապնդման թեզը՝ այն հասցնելով ընդհուպ մինչև եվրոպական դատական ատյաններ: Բացի այդ, կասկածից վեր է, որ ՀՀԿ-ն ու գուցե նաև այլ ուժեր՝ միջազգային տարբեր հարթակները կհեղեղեն գրություններով, դիմումներով, որ Հայաստանի իշխանությունները փորձում են ահաբեկել իրենց կողմնակիցներին, կամ էլ իրականացվում է ընտրողական արդարադատություն, որի հետևանքով քաղաքական հետապնդումների է ենթարկվում Երկրորդ նախագահը, նրա դեմքով՝ հին համակարգը։

Մյուս կողմից, հասկանալի է, որ Երկրորդ նախագահին քաղաքական դաշտից մեկուսացնելու խնդիր կա: Իհարկե, նա չի մասնակցում խորհրդարանական ընտրություններին, սակայն դա չի նշանակում, որ Ռոբերտ Քոչարյանը դադարել է լինել քաղաքական գործոն: Նիկոլ Փաշինյանը ակնհայտորեն ձգտում է միանձնյա վերահսկողություն սահմանել քաղաքական, կառավարման համակարգի նկատմամբ, և այս գործում նրա խաղաքարտերը կարող են լրջորեն խառնվել, եթե խաղի մեջ մտնի Քոչարյանը:

Իսկ ի՞նչ կլիներ, եթե Վերաքննիչ դատարանը որոշեր ի վերջո չկալանավորել Ռոբերտ Քոչարյանին։ Այդ պարագայում, անշուշտ, հանրության շրջանում կառաջանային անվստահության սերմեր, որովհետև ակնհայտորեն կոնտրաստ կստեղծվեր Նիկոլ Փաշինյանի նախընտրական կոշտ հռետորաբանության և իրականության միջև։ Գուցե շտապողականության պատճառները պետք է փնտրել նաև իշխանությունների՝ երկու քարի արանքում հայտնվելու մեջ…

Ս.Խաչատրյան