«Չորրորդ ինքնիշխանություն». Պարույր Հայրիկյանը պայքարելու է ինքն իր դեմ

Պարույր Հայրիկյանը հայտարարել է, թե անպայման առաջադրվելու է որպես նախագահի թեկնածու, հաղթելու դեպքում էլ փոխելու է Սահմանադրությունը և վերացնելու է նախագահի պաշտոնը:

«ՉԻ»- Եթե հաշվի առնենք հայ ժողովրդի համարյա ամեն ինչի հիմնադիր Պարույր Հայրիկյանի իրական հնարավորությունները, ապա նախագահի ինստիտուտին գործնականում ոչինչ չի սպառնում: Խնդիրը, սակայն դա չէ, այլ այն, որ նա փաստորեն խոստանում է նախագահ դառնալուն պես առաջին հերթին պայքարել ինքն իր դեմ: 

Տեսեք, թե ինչ է ստացվում: Ենթադրենք (դժվար է, բայց պետք է փորձել), որ ժողովրդի 55 տոկոսն իր ձայնը տվել է Պարույր Հայրիկայնին: Դա նշանակում է, որ ժողովրդի 55 տոկոսը ցանկացել է, որ Հայաստանի նախագահը լինի Պարույր Հայրիկյանը: Իսկ նա հայտնվում է նախագահականում և ասում՝ «գլուխներդ պատով եք տվել, Հայաստանին նախագահ պետք չէ»: Ստացվե՞ց, որ խաբել է իր ընտրողներին: Ստացվեց: Իսկ խաբելը լավ չէ: Ոմանք նույնիսկ պնդում են, որ սուտ ասելիս մարդու քիթը երկարում է: Այնպես որ՝ կարելի է այլ «պլատֆորմ» մշակել: