Ինքնաբացարկ հայտարարած թեկնածուն քվեարկելու է Բակո Սահակյանի օգտին

Lurer.com-ը խոսել է Արցախի նախագահական ընտրություններում հուլիսի 9-ին ինքնաբացարկ հայտարարած թեկնածու Վալերի Խաչատրյանի հետ, ով ինքնաբացարկը պատճառաբանում է այսպես.

«Ես առաջադրվել էի՝ վստահ լինելով, որ անպայման կընտրվեմ։ Հաշվի առնելով իմ աշխատանքային փորձը՝ ես կարող էի ինձ արդարացնել նախագահի պաշտոնում, քանի որ երկրի արտաքին ու ներքին քաղաքականության, տնտեսական և սոցիալական հարցերի մասին ունեի սկզբունքային պատկերացումներ։ Ինձ չէր հետաքրքրում երկրորդ կամ երրորդ տեղը, ինձ համար նախընտրելի էր միայն հաղթանակը, սակայն քսան օրվա քարոզարշավի ընթացքում պարզ դարձավ, որ կա մարդ, ով ավելի ուժեղ է, այդ պատճառով էլ հաջորդեց իմ հրաժարականը։ Այդ թեկնածուն Բակո Սահակյանն է»,- պարզաբանեց նախագահի արդեն նախկին թեկնածուն։

Իսկ այն հարցին, թե ում օգտին է քվեարկելու նախագահական ընտրություններին, վերջինս պատասխանեց.

«Ես ողջ էությամբ և բովանդակությամբ պետական մտածելակերպի տեր մարդ եմ, ինձ համար նախ՝ կարևոր են ժողովրդի, հետո՝ իմ անձնական շահերը, եթե ժողովուրդը ընդունում է գործող նախագահին, ապա ես էլ ժողովրդից հետ չեմ մնա ու կընտրեմ Բակո Սահակյանին»,- ամփոփեց զրույցը Վալերի Խաչատրյանը։