Միթ Ռոմնին առաջատարն է նախընտրական միջոցներ հավաքելու պայքարում

ԱՄՆ նախագահի հանրապետական թեկնածու Միթ Ռոմնիի նախընտրական հիմնադրամն ԱՄՆ ներկայիս նախագահ Բարաք Օբամայի նախընտրական հիմնադրամից ավելի մեծ գումարներ է հավաքագրել։

Ռոմնիի նախընտրական հիմնադրամը հունիսին հավաքել է 106 միլիոն դոլար, որը 35 միլիոն դոլարով գերազանցում է Օբամայի նախընտրական հիմնադրամի հունիս ամսվա հավաքած գումարից, որը կազմել է 71 միլիոն դոլար, հաղորդում է BBC-ն։

Այդ գումարները չեն ներառում իրենց թեկնածուներին աջակցող անկախ կազմակերպությունների կողմից տրամադրված նվիրատվությունները։

Օբամայի նախընտրական շտաբի ակտիվիստները դրամահավաք են անցկացնում էլեկտրոնային փոստի միջոցով, քաղաքացիներին ուղարկելով հետևյալ հաղորդագրությունը՝ «Եթե մենք պարտվենք այս ընտրություններում, ապա դրա պատճառը կլինի այն, որ չօգտագործեցինք հակառակորդին հանկարածակիի բերելու հնարավորությունը»։

Օբամայի նախընտրական շտաբի ներկայացուցիչներն իրենց թեկնածուի կողմնակիցներին հիշեցնում են, որ ԱՄՆ-ի պատմության մեջ Օբաման կարող է դառնալ առաջին նախագահը, ով նախընտրական ընտրարշավի ընթացում կատարած ծախսերով և ռեսուրսներով չի կարողանա գերազանցել իր մրցակցին։

Ըստ պաշտոնական տվյալների, Ռոմնիի նախընտրական հիմնադրամի հավաքած գումարը հունիսին կազմել է 160 միլիոն դոլար:

Թեև Ռոմնիի նախընտրական կամպանիան ֆինանսական հաջողություններ է արձանագրում, ըստ փորձագետների, Ռոմնիի՝ որպես ԱՄՆ-ի նախագահի հանրապետական թեկնածուի քարոզարշավը շատ ավելի թույլ է և հաճախ դժվարությունների առջև է կանգնում։

Ռոմնին նախընտրական քարոզարշավի ընթացքում ստիպված է եղել մի շարք շեշտադրումներ փոխել՝ կապված ԱՄՆ-ի ֆինանսատնտեսական ոլորտի հետ, քանի որ հասարակական կարծիքի վերաբերյալ վերջին մի քանի հարցումները ցույց են տալիս, որ Օբաման առանցքային նշանակություն ունեցող նահանգներում պահպանում է առավելությունն իր մրցակցի նկատմամբ։

Հիշեցնենք, որ ԱՄՆ-ի նախագահական ընտրությունները տեղի կունենան նոյեմբերի 6-ին։