Հայաստան-Իրան. համագործակցություն նաև ԱԻ ոլորտում

Հուլիսի 10-ին ՀՀ ԱԻ նախարար Արմեն Երիցյանն ընդունել է Իրանի Իսլամական Հանրապետության ներքին գործերի նախարար Մոսթաֆա Մոհամադ Նաջարի գլխավորած բարձրաստիճան պատվիրակությանը: Արտակարգ իրավիճակների կառավարման ոլորտն Իրանում գտնվում է ներքին գործերի նախարարության ենթակայության տակ:

Ողջունելով հյուրերին' Ա. Երիցյանը ներկայացրեց ԱԻ նախարարության ստեղծման պատմությունն ու գործունեությունը:

Իրանի ներքին գործերի նախարար Մոսթաֆա Մոհամադ Նաջարին շնորհակալություն հայտնելով ընդունելության համար' մասնավորապես ասաց.

-Որպես հարևան երկրներ, մենք կարող ենք շատ լավ համագործակցել հատկապես բնական աղետների հետ կապված ոլորտներում, իրականացնել տեղեկատվության և փորձի փոխանակում' աղետների կանխարգելման ու արձագանքման վերաբերյալ: Օրինակ' այս տարի Գյուլիստան նահանգում մենք խոշոր անտառային հրդեհ ունեցանք, որը մարելու համար մի քանի օր պահանջվեց և, նույնիսկ, գործի դրվեցին ուղղաթիռները: Մենք անգամ մտածում էինք դիմել հարևան երկրների օգնությանը:

Մեր երկրի մի մասում ուժեղ երաշտներ են, իսկ մյուս հատվածները ենթակա են ցրտահարության ու ջրհեղեղների վտանգին: Կլիմայի փոփոխությունները նույնպես լուրջ ուսումնասիրությունների կարիք ունեն: Այդ ուղղությամբ մենք ևս կարող ենք համատեղ գիտահետազոտական աշխատանքներ կատարել:

Շատ ենք կարևորում նաև աղետների ու պատահարների կանխարգելման խնդիրը, քանի որ դա զգալիորեն նվազեցնում է հետևանքների վերացման համար ծախսվող միջոցները:

Մեր մյուս խնդիրը պատրաստվածության բարձրացումն է և աղետների հետևանքների վերացումը: Կարծում եմ, որ այս բոլոր ուղղություններով մենք կարող ենք արդյունավետ համագործակցություն ծավալել:

ԱԻ նախարար Ա. Երիցյանը համաձայնեց, որ ընդհանուր եզրեր շատ կան և փոխգործակցության վերաբերյալ համաձայնագիր ստորագրելուց հետո համագործակցությունը կդրվի ամուր հիմքերի վրա:

Հանդիպման ընթացքում իրանցի հյուրերին հետաքրքրող հարցերը շատ էին: Նրանց մասնավորապես հետաքրքրում էր մեր հակակարկտային համակարգը: ԱԻ նախարարը, հանգամանալից պատասխանելով հարցերին, նշեց, որ անհրաժեշտության դեպքում իրենք կարող են նորից այցելել Հայաստան և ավելի մանրամասն տեղեկություններ ստանալ բոլոր հետաքրքրող հարցերի վերաբերյալ:

Իրանի պատվիրակության անդամները հանդիպման ավարտին շրջայց կատարեցին ԱԻ նախարարության շենքում, եղան ճգնաժամային կառավարման կենտրոնում, ծանոթացան դրա տեխնիկական զինվածությանն ու հնարավորություններին, տեսան նախարարության նորակառույց մասնաշենքն ու ԱԻ նախարարի շարժական կառավարման կետը:

Պատվիրակությանն ուղեկցող իրանական լրատվամիջոցներից մեկին տված հարցազրույցում ԱԻ նախարար Ա. Երիցյանն ասաց, որ երկու երկրները համագործացելու են արտակարգ իրավիճակների հետ կապված բոլոր հնարավոր ուղղություններով և անհրաժեշտության դեպքում օգնության են հասնելու միմյանց: