Մարությանն ու իր թիմը գտածո են ընդդիմության համար

Վերլուծական 21 Դեկտեմբեր, 2018 21:30

Երևանի քաղաքապետ Հայկ Մարությանի համար ծանր օրեր են սկսվել: Եկել է տրված նախընտրական խոստումների իրականացման ժամանակը, իսկ քաղաքապետը, ինչպես երևում է, ցայտնոտի մեջ է, դրա մասին են վկայում Երևանում օր-օրի սնկի պես աճող խնդիրները և Երևանի ավագանու մաս կազմող ընդդիմության առավել հաճախակի դարձած և օբյեկտիվ հարձակումները:

Ընտրվելուց քաղաքապետը նշում էր, որ ինքն իրեն է լինելու ընդդիմություն, սակայն ինչպես երևում է ՝ կողմնակի վերահսկողության կարիքը ամեն դեպքում զգացվում է, թերևս նրա համար որպեսզի քաղաքապետը առիթից առիթ վերհիշի երևանցիներին տված խոստումների մասին: Օրինակ, Մարությանը խոստացել էր որ Երևանը կունենա աղբահանության երկրորդ օպերատորը: Այսօր պարզվել է, որ սայլը տեղից շարժվել է սակայն երբ կհասնի նշանակետին՝ հայտնի չէ: Իսկ Երևանը կորած է աղբի մեջ:Մարությանը գտնում է, որ հասարակությանը պարտադիր չէ տեղեկացնել ընթացիկ բանակցությունների մասին, սակայն հասարակությունը պահանջում է հաշվետվողականություն և հաշվետվողականություն յուրաքանչյուր հարցի շուրջ, յուրաքանչյուր փուլում:

Փոխարենը քաղաքապետարանում կարող են ավելացնել օրինակ՝ արտասահմանյան գործուղումների համար նախատեսված գումարները և հայտարարել , որ դա օրինաչափ է, քանի որ նոր և նախկին իշխանության նպատակները տարբեր էին: Հասկանալի չէ, թե այդ ինչ «կայսերական» նպատակներ ունի Մարությանի թիմը, որ անգամ Տարոն Մարգարյանի և նրա թիմի մտքով չէր անցել:

Քաղաքապետն ու իր թիմը կարող են նվազեցնել առանցքային խնդիրների լուծման համար նախատեսված գումարները և այնուհետև քաղաքապետի մակարդակով ասուլիսի ժամանակ հայտարարել, թե հուսով են ձյուն գալուց հետո Հայաստանը Սոդոմ և Հոմորի չի վերածվի, ավելացնելով, որ բավարար չափով միջոցներ ամեն դեպքում չունեն:Այս ամենից երևում է, որ քաղաքապետը կամ չի ցանկանում, կամ էլ պարզապես ի վիճակի չէ լուծել իր առջև դրված խնդիրները: Ինչպես ասում են՝ ընդդիմության աչքը լույս: Քաղաքապետ Մարությանը իր թիմով քաղաքական ընդդիմախոսների համար պարզապես գտածո է...