Բաց նամակ նախագահին՝ զբոսաշրջության ոլորտի զարգացման վերաբերյալ

Մեծարգո պարոն Նախագահ,

Հայաստանում տուրիզմի զարգացման համար կան բազում հնարավորություններ և նախադրյալներ: Զբոսաշրջության ոլորտը հռչակվել տնտեսության գերակա ճյուղ, բայց պետք է նշեմ, որ ուղղակի հռչակելով այն գերակա ճյուղ` չես զարգացնի:

Այսօր զբոսաշրջությունը Հայաստանում զարգանում է առանց հստակ ռազմավարության և քաղաքականության:

Մասնավորապես` ավիատոմսերի անհասկանալի բարձր գները, որի մասին բազմիցս ասվել է ԶԼՄ-ների հրապարակումներում, սակայն այդ նյութերը բավարար չեն, որպեսզի ՀՀ տնտեսական մրցակցության պաշտպանության պետական հանձնաժողովը իրականացնի ուսումնասիրություններ կամ պարզաբանումներ ավիատոմսերի գնագոյացման վերաբերյալ: Նաև պետք է նշեմ, ինչպես պարզվեց ՀՀ կառավարությանն առընթեր քաղաքացիական ավիացիայի գլխավոր վարչությունում քննարկումների ընթացքում` ենաշնորհային դիրք ունեցող «Արմավիա» ավիաընկերությունը չի հանդիսանում ազգային փոխադրող: Իհարկե անհասկանալի է դառնում, թե ինչու է «Արմավիա» ՍՊԸ-ն օգտվում ազգային փոխադրողի արտոնություններից:

Ավիափոխադրումների խնդիրը հնարավոր է լուծել միայն այն դեպքում, եթե ստեղծվի ազգային փոխադրող և մշակվի ճիշտ գնային քաղաքականություն, և այդ դեպքում մենք տարեկան կընդունենք ոչ թե 600 հազար այցելու, այլ 3 միլիոն և ավել:

Ոչ պակաս կարևոր խնդիր է հյուրանոցների որակավորումը` որը պետք է համապատասխանի միջազգային ստանդարտներին և ոչ թե հայկական: Ճիշտ որակավորումը կնպաստի սպասարկման մակարդակի և որակի բարձրացմանը, իսկ ներկայում այն նպաստում է միայն գների բարձրացմանը: ՀՀ Էկոնոմիկայի նախարարության զբոսաշրջության վարչության կողմից մշակված զբոսաշրջության մասին նոր օրենքի նախագծում նշված է, որ հյուրանոցների որակավորումը պետք է իրականացվի ըստ ցանկության: Փոխարենը պետք է իրականացնի տուրիստական գործակալությունների պարտադիր հաշվառում և որակավում: Իհարկե դա հասկանալի և ընդունելի կլիներ, եթե առաջին հերթին հաշվառվեն և որակավորվեն մատակարները, հետո նոր տուրիստական ծառայություններ մատուցող կազմակերպությունները: Նման մոտեցումը ոչ արդյունավետ է:

Ըստ ՀՀ Էկոնոմիկայի նախարարության Հայաստանում նաև դինամիկ զարգանում և զբոսաշրջության բնագավառում լայնորեն կիրառվում են տեղեկատվական տեխնոլոգիաները: Գրեթե չկա որևէ կազմակերպություն, որ չունենա իր ինտերնետային կայքը, և ընդամենը մեկ առցանց համակարգ ամբողջ Հայաստանի համար: Իհարկե դա ամենայն հավանականությամբ վկայում է զբոսաշրջության դինամիկ զարգացման մասին:

Ավելորդ է ասել, որ շատ լուրջ խոչընդոտ է հանդիսանում նաև տարածքային զարգացման անհամաչափությունները' զվարճանքի և մշակութային կենտրոնների բացակայությունը, ճանապարհների վերանորոգումը, հիմնականում մարզերում: Օրինակ' ամենա շատ այցելվող վայրերից մեկը Գառնի տաճար տանող ճանապարհը վերանորոգնեց այս տարի այն ժամակ երբ ՀՀ առաջին տիկին Ռիտա Սարգսյանը և Լեհաստանի առաջին տիկին Աննա Կոմորովսկան, հուլիսի 28-ին այցելել են Գառնի և ծանոթացել են հեթանոսական տաճարի պատմությանը: Իսկ Գեղարդի ճանապարհը այդպես էլ մնաց չվերանորոգված:

Նման խնդիրների շարքը կարելի է անվերջ թվարկել, որոնց գոյության մասին, ասել, որ տեղյակ չեն պետական և լիազոր մարմինները, փոքր-ինչ անտրամաբանական կհնչի:

Ինչպես արդեն ներկայացրել էի Ձեզ ուղված նամակում նաև ՀՀ Նախագահի աշխատակազմի ղեկավար Վ. Սարգսյանին` այս խնդիրների լուծումը շատ պարզ է, պետք է այս ուղղությամբ իրականացնել անհրաժեշտ և նպատակային քայլեր: Պետք են հարկային, մաքսային բարեփոխումներ և արտոնություններ, արտոնյալ վարկեր, սուբսիդավորում: Ճիշտ գնային քաղաքականություն մշակել, ներդնել նոր համակարգ և մեխանիզմներ, որոնք կնպաստեն ոչ միայն Հայաստանը դարձնել համաշխարային զբոսաշրջության առաջավոր կենտրոններից մեկը, այլ նաև թույլ կտա վերահսկել ամբողջ ոլորտը: Նպատակային բարեփոխումների շնորհիվ մենք կարող ենք ոչ միայն ավելացնել Հայաստան այցելուների թիվը հինգ և ավել անգամ, այլ նաև բյուջե վճարվող հարկերի գումարը ավելացնել տասն անգամ:

Իհարկե եթե պետությունը և զբոսաշրջության շահագրգիռ կողմերը համագործակցեն, ապա տուրիզմը Հայաստանում շատ արագ և դինամիկ կզարգանա և այս ոլորտն իր հերթին կզարգացնի բազմաթիվ այլ հարակից ոլորտներ, ինչպես շատ զարգացած երկրներում:

Նաև պետք է նշեմ, որ այսօր պետական մարմինները առանց Ձեր անմիջական կարգադրությամբ և մասնակցությամբ չեն իրականացնում որևէ քայլ մեր տնտեսության զարգացման գործում:

Հուսով եմ այս նամակը կարժանանա Ձեր ուշադրությանը, և Ձեր բարձր հովանավորությամբ կհաջողվի լուծել այն խնդիրները, որոնք այսօր խոչընդոտում են զբոսաշրջության զարգացմանը:

Հարգանքով`

Աննա Սարգսյան

«Մագնոլիա Տուրս» ՍՊԸ

Հիմնադիր տնօրեն