Քաղաքապետը այդպես էլ դուրս չեկավ «սիթքոմային» կոմեդիանտի դերից (տեսանյութ)

Երևանի քաղաքապետ Հայկ Մարությանը դեռևս ամբողջությամբ չի մտել քաղաքապետի իր դերի մեջ: Դրա մասին են վկայում մայրաքաղաքի առջև ծառացած և կուտակված բազմաթիվ հիմնախնդիրները: Այն հույսերը, որ Երևանի բախտը` կապված ղեկավարության հետ, ի վերջո կբերի, հազիվ թե արդարանան: Եթե նորանշանակ քաղաքապետը, ով մինչ այս պահը չի աշխատել քաղաքային տնտեսության հետ փոքր–ինչ առնչություն ունեցող որևէ կառույցում, այլ գործել է բացարձակ այլ ոլորտում, թույլ է տալիս իրեն մեղադրել Ավագանու փորձառու անդամներին անգործության և ձրիակերության մեջ, ապա` հարցեր այլևս, այս առումով, չեն առաջանում։ Հարցերը առաջանում են` կապված նորընտիր քաղաքապետի աշխատանքային էթիկայի հետ: Ավելի ու ավելի է Մարությանը հիշեցնում լավ մոռացված անցյալը, ավելի ճիշտ` այն անցյալը, որը երևանցիները հույս ունեին մոռանալ, բայց... 

Ավագանու վերջին նիստին Մարությանը, տեսնելով որ չի փայլում աշխատանքում, որոշեց փայլել հումորով: Կոմեդիանտը միշտ էլ մնում է կոմեդիանտ: Ավագանու Լույս դաշինքի անդամ Անի Խաչատրյանի դիտարկմանը, թե բուֆետը փակ է և դա որոշակի անհարմարություն է առաջացնում, Մարությանը սրամտում է` ասելով, որ դա գուցե և ի շահ իրեն է արված: Թե որքանով է նման պահվածքը տեղավորվում էթիկայի շրջանակներում՝ դատեք ինքներդ: Լավ է դեռ Մարությանը չի պահանջում իր թիմակիցներից ավագանու կին անդամների «դեմը առնել», սակայն այն, որ քաղաքապետը` եթե թույլ կտաք այդպես արտահայտվել, դուրս չի եկել սիթքոմի հայտնի հերոսի կարգավիճակից և ինչն էլ ավելի կարևոր է` հոգեվիճակից՝ դա ակնհայտ է:

Քաղաքապետարանը նրա համար կոմֆորտ վայր չէ. այստեղ չեն ծիծաղում, էժանագին հումորով չեն փայլում, չեն փորձում խայթել միմյանց, այստեղ աշխատում են՝ մի բան, ինչը, ըստ երևույթին, Մարությանի խելքի բանը չէ: Հուսանք` այն ռեզոնանսը, որը հանրության շրջանում առաջացնում է քաղաքապետի անքաղաքավարի պահվածքը, ի վերջո կստիպի նրան սթափվել և չմոռանալ` ինչի համար է ստացել այդ նույն հանրության 80 տոկոս քվեն...

Տեսանյութը՝ news.am-ի