«Չորրորդ ինքնիշխանություն». Ֆինանսավորումը հանձնել են Ֆլեշի Բարսեղին

««ՉԻ»-ի նոյեմբերի 9-ի համարում «Օլիգարխին հանձնարարել են ֆինանսավորել» վերնագրով հրապարակման ներքո տեղեկություն էին տարածել, համաձայն որի` Սերժ Սարգսյանը շարունակում է քաղաքական դաշտում մոռացված գործիչների հետ բանակցություններ վարել` նրանց ՀՀԿ ցուցակով ԱԺ պատգամավոր դարձնելու ուղղությամբ։

Խոսքը ՀՀԿ-ում այնքան էլ չսիրված եւ չհարգված գործիչների մասին է. թվարկենք՝ «Ազգային միաբանության» առաջնորդ Արտաշես Գեղամյան, ԱԻՄ առաջնորդ Պարույր Հայրիկյան, ՀՔԴՄ առաջնորդ Խոսրով Հարությունյան, ՀԴԿ առաջնորդ Արամ Սարգսյան։ Եվ չնայած ՀՀԿ բացասական տրամադրություններին` Սերժ Սարգսյանը հենց նրանց է ցանկանում ՀՀԿ ցուցակով մանդատի տեր դարձնել։ 

«ՉԻ»-ն տեղեկացրել էր նաեւ, որ այս ցանկում չի շրջանառվում ԱԺՄ առաջնորդ Վազգեն Մանուկյանի անունը։ Խնդիրն այն է, որ, մեր տեղեկություններով, Սերժ Սարգսյանը պատվիրել է ղարաբաղյան ծագում ունեցող օլիգարխներից մեկին ֆինանսավորել ԱԺՄ-ին եւ պահանջված մեծ գումարները ծախսել, որպեսզի ԱԺՄ-ն կարողանա որպես առանձին քաղաքական ուժ մասնակցել խորհրդարանական ընտրություններին։ Մեր տեղեկություններով օրերս Վազգեն Մանուկյանը հրահանգել է իր մարզային կառույցների ղեկավարներին մարզերում սկսել կուսակցական բջիջներ ստեղծել եւ գրասենյակներ բացել: Նա ասել է, որ պետք է ակտիվանալ առաջիկա ընտրություններին ընդառաջ: Ինչ վերաբերվում է ֆինանսներին, ապա Մանուկյանն ասել է, որ առաձնապես խնդիր չկա, քանի որ գործարար Բարսեղ Բեգլարյանը` Ֆլեշի Բարսեղը, խոստացել է ֆինանսավորել ԱԺՄ-ին: Ի դեպ` նախագահականի մեր աղբյուրները տեղեկացնում են, որ դա ոչ թե խոստում է, այլ ռեալ պայմանավորվածություն, որը նախ Ֆլեշի Բարսեղը ձեռք է բերել Սերժ Սարգսյանի հետ»՝ հայտնում է թերթը: