Մենակությունը վարակիչ է. հետազոտություն

Ամերիկացի գիտնականները հանգել են այն եզրակացության, որ մենակության զգացումը վիրուսային հիվանդությունների նման կարող է փոխանցվել այլ մարդկանց:

Չիկագոյի, Հարվարդի, ինչպես նաև Կալիֆորնիայի նահանգի հետազոտողները վերլուծել են Մասսաչուսեթս նահանգի Ֆրեյմինհեմ քաղաքի մոտ 5000 բնակչի տվյալները: Այս տվյալների հիման վրա գիտնականները կառուցել են մարդկանց փոխհարաբերությունների գրաֆիկական սխեմա, որը պարունակել է նաև տեղեկատվություն ընկերների կորստի և միայնության մասին:

Սխեման ցույց է տվել, որ միայնակ մարդիկ, ժամանակի ընթացքում կորցնելով սոցիալական կապերը, միայնությամբ են վարակում նաև իրենց ընկերներին: Պարզվել է նաև, որ միայնակ մնալու ռիսկը մեծապես կախված է ոչ թե բարեկամական հարաբերություններից, այլ ընկերախմբի փոփոխությունից:

Բացի այդ, գիտնականները հանգեցին այն եզրակացության, որ կանայք, որոնք ավելի մեծ կարիք ունեն էմոցիոնալ աջակցության, ավելի շատ են ենթարկվում մենակության զգացողությամբ «վարակվելու» վտանգին:

Ջոն Կաչիոպպոյի՝ հետազոտողներից մեկի կարծիքով մենակությունը նվազեցնում է շրջապատի հանդեպ վստահությունը, ինչի պատճառով էլ մարդն ավելի մենակ է դառնում: Գիտնականը նաև հավելում է, որ քանզի միայնությունը կապված է կյանքի որակի և տևողության վրա ազդող մի շարք ֆիզիկական և հոգեկան խանգարումների հետ, մարդիկ պետք է ավելի շատ ուշադրություն դարձնեն ընկերների և բարեկամների հետ իրենց փոխհարաբերություններին: