«Հայկական ժամանակ». պայմա՞ն կապեցին

«Երեկ լուր ստացվեց, թե նախորդ օրը ՀՀԿ-ի և ԲՀԿ-ի առաջին դեմքերի, այսինքն՝ Սերժ Սարգսյանի և Գագիկ Ծառուկյանի միջև պայմանավորվածություն է ձեռք բերվել ԱԺ առաջիկա ընտրություններին միասնական ցուցակով մասնակցելու մասին:

ԲՀԿ-ից երեկ այս կապակցությամբ որևէ պաշտոնական մեկնաբանություն ստանալ չհաջողվեց: ԲՀԿ-ականները հրաժարվում էին հերքող կամ հաստատող որևէ մեկնաբանություն անել: ՀՀԿ ներկայացուցիչ, ԱԺ պատգամավոր Հովհաննես Սահակյանն էլ մեր թղթակցի հարցին ի պատասխան ասել է. «Չեմ բացառում: Ձեր տեղեկությունը կարող է և հավաստի է, բայց նման հարց ՀՀԿ խորհրդում դեռևս չի քննարկվել»: Սահակյանը ասել է նաև, որ ընտրություններին կոալիցիոն կուսակցությունների միասնական ցուցակով մասնակցելը չի բացառվում այնքան ժամանակ, քանի դեռ որոշում չի կայացվել, որ կոալիցիա կազմող քաղաքական ուժերն ընտրություններին մասնակցելու են առանձին-առանձին: Մեր թղթակցի ճշտող հարցին ի պատասխան՝ Սահակյանն ասել է, որ կոալիցիոն կուսակցությունների՝ առանձին-առանձին մասնակցության մասին որոշում չի կայացվել, բայց այս պահին չկա նաև միասնական ցուցակով մասնակցելու որոշում»,- գրում է թերթը: