Պարտավոր էին բոլոր միջոցները ձեռնարկել' անխափան ոռոգում ապահովելու համար

ՀՀ փոխվարչապետ, տարածքային կառավարման նախարար Արմեն Գեւորգյանն այսօր որոշ լրատվամիջոցների խնդրանքով անդրադարձել է Սեւանա լճից ջրառի անհրաժեշտությանը, ոռոգման ջրի սակագնի, նորմատիվների փոփոխությունների մասին հայտարարություններին.

"Սեւանա լճից լրացուցիչ ջրառի խնդիրը շարունակում է մնալ արդիական, քանի որ սակավաջուր տարով պայմանավորված' ջրային պաշարները բավարար չէին գյուղատնտեսության համար լիարժեք ոռոգում իրականացնելու համար: Մենք սովորաբար Սեւանից ոռոգման նպատակով ջուր սկսում էինք վերցնել հունիսի կեսերին, եւ օրենքով նախատեսված 170մլն խմ ջրաքանակը բավարարում էր: Այս տարի, ինչպես բազմիցս նշվել է, Սեւանից ջրառն սկսվել է մայիսի 2-ից, եւ հուլիսի 10-ի դրությամբ արդեն 143 մլն խմ վերցվել է: Այս տեմպերի դեպքում 170 մլն խմ-ը կսպառվի հուլիսի վերջին: Ուստի լրացուցիչ ջրառի վերաբերյալ օրենսդրական նախաձեռնությունն անհրաժեշտություն էր' գյուղացիական տնտեսությունների համար անխափան ջրամատակարարում ապահովելու համար: Հաշվի առնելով, որ երկու խոշոր դոտացիոն' 91 մլն խմ ծավալ ունեցող Ապարանի եւ 70 մլն խմ ծավալ ունեցող Ազատի ջրամբարներում այս տարի կուտակվել է համապատասխանաբար 39.3 մլն եւ 63.6 մլն խմ, իսկ Հրազդան գետի ջրատվությունը, որը Սեւան-հրազդանյան համակարգի հիմնական աղբյուրներից մեկն է, անցած տարվա համեմատ 2 անգամ պակաս էր, մենք պարտավոր էինք բոլոր միջոցները ձեռնարկել' անխափան ոռոգում ապահովելու համար:

Միաժամանակ Սեւանից բաց թողնվող ջուրն առավելագույնս օգտագործվելու է խնայողաբար: Ցանկանում եմ հիշեցնել, որ 2008 թ-ին եւս Ազգային ժողովը Սեւանից 360 մլն խմ ջրբացթողում արտոնեց, բայց օգտագործվեց ընդամենը 302 մլն խմ-ը: Անձրեւային եղանակը, ինչի մասին նշում են որոշ փորձագետներ, կնպաստի ջրի պահանջի նվազմանը, եւ դա, անկասկած, կազդի Սեւանից բաց թողնվող ջրի ծավալների վրա: Այս վերջին շրջանում այդպիսի միտում նկատվում է. եթե մայիսից մինչեւ հունիսի կեսերը Սեւանից օրական վերցվում էր միջինը 2-3 մլն խմ, հուլիսի 10-ին, օրինակ, վերցվել է 1,8 մլն խմ: Այնպես որ, հնարավոր է, որ ոռոգման շրջանի ավարտին ունենանք ոչ թե 320 մլն ջրառ, որի թույլտվությունը տրվել է օրենքով, այլ ավելի քիչ: Սեւանից բաց թողնվող ջուրը բացառապես օգտագործվում է ոռոգման համար, եւ այն էներգետիկ նպատակներով վերցնելու մասին տեղեկություններն իրականությանը չեն համապատասխանում: Որեւէ այլ նպատակ, բացի ոռոգման համար անհրաժեշտ ջրաքանակ ապահովելուց, չի հետապնդվել:

Ինչ վերաբերում է ՋՕԸ-երի կողմից ջրի սակագների բարձրացման կամ նորմատիվների փոփոխությունների մասին հայտարարություններին, ապա պետք է նշել, որ նման փոփոխություններ կատարվում են ոչ թե ՋՕԸ-ների, ինչպես նշում են որոշ հասարակական կազմակերպությունների ներկայացուցիչներ, այլ կառավարության կողմից: Ներկայիս գործող սակագինը' 1 խմ դիմաց 11 դրամ, սահմանվել է դեռեւս 2007 թ. կառավարության որոշումով եւ վերհաստատվել է 2010 թ-ին: Մինչեւ չլինի համապատասխան կառավարության որոշում, որեւէ մեկը որեւէ սակագին չի կարող փոխել: Այլ խնդիր է, որ գյուղացիական տնտեսություններում կարող է ջրի ծավալի օգտագործումն ավելանալ. դրանք արդեն կոնկրետ ՋՕԸ-ի եւ գյուղացու միջեւ կնքված պայմանագրի շրջանակում գտնվող հարաբերություններ են:

Նորմատիվները նույնպես չեն փոխվել, դրանք հաստատվել են 2007թ-ին եւ փոփոխության անհրաժեշտություն առայժմ չկա":