Երբեւէ որեւէ մեկին չի առաջարկել վճարում կամ նվիրատվություն կատարել «Հայաստան» հիմնադրամի հաշվին. պարզաբանում

«Հետք» պարբերականի հուլիսի 10-ի «Ամերիկահայ Պավել Անդերսոնն ասում է, որ կաշառել է քաղաքապետարանի ու դատարանների ներկայացուցիչներին» հրապարակման առնչությամբ մեկ անգամ եւս հայտնում ենք, որ Արմեն Գեւորգյանի` որպես ՀՀ նախագահի աշխատակազմի նախկին ղեկավարի առնչությունը նշված գործին բացառապես սահմանափակվում է այն իրադարձությունով, որի մասին նշվել է «Հետքին» տրված հետեւյալ պարզաբանման մեջ.

«Հանդիպումը կայացել է բացառապես «Վիզկոն» ընկերության նախաձեռնությամբ եւ աշխատանքային բնույթ է կրել: Հանդիպման ժամանակ ընկերության ներկայացուցչին պարզաբանվել է, որ դատական ատյանների վարույթում գտնվող գործերին ՀՀ նախագահի աշխատակազմը որեւէ կերպ չի կարող միջամտել:

Հայտնում ենք, որ Արմեն Գեւորգյանը ինչպես ՀՀ նախագահի աշխատակազմում, այնպես էլ ներկայիս զբաղեցրած պաշտոնում աշխատելիս երբեւէ որեւէ մեկին չի առաջարկել վճարում կամ նվիրատվություն կատարել «Հայաստան» հիմնադրամի հաշվին:

Ելնելով նշվածից, կարծում ենք, որ հիմնադրամի հետ հարաբերությունները «Վիզկոն» ընկերության սեփական նախաձեռնության շրջանակում են»:

Նշված գործով դատարանների նկատմամբ Ա. Գեւորգյանի կողմից վերահսկողության մասին ենթադրությունները պարզապես իրականության հետ որեւէ առնչություն չունեն:

Ինչ վերաբերում է «Հայկական ժամանակ» օրաթերթի հուլիսի 11-ի հրապարակմանը, ապա, կոռեկտ չէ, երբ աղբյուրից, որին հղում է կատարվում, օգտվում են ընտրողաբար՝ անգամ խեղաթյուրելով ներկայացված տեղեկությունները: