«Չորրորդ ինքնիշխանություն». Պատգամավորներն աղքատանալու են. Լյովա Խաչատրյան

«ՉԻ» տեղեկությունների համաձայն, ապարանցի Լյովա Խաչատրյանը, որը մշտապես ջանում է իր քաղաքական «կնքահոր»՝ Աղվան Հովսեփյանի հետքերով գնալ, այդպես էլ ձեռ չի քաշում իր նոր մշակութային նախաձեռնությունից:

Թերթի հիշեցմամբ՝ խոսքը Ջավախքում անցկացվող «Համերաշխության պար» ծրագրի մասին է, որի հետ կապված նա փորձում է նախ հստակեցնել ծրագրի ֆինանսական մասի հետ կապված խնդիրները:

Ըստ լուրերի, օրերս Վրաստանի «Շեռատոն» հյուրանոցում տեղի ունեցած հանդիպման ժամանակ Լյովա Խաչատրյանը իր փայլուն մտահղացման համար փորձել է լսել մեկ այլ ջավախքցի օրենսդիր Վարդան Այվազյանի կարծիքը, որն էլ էս գլխից ասել է, որ ինքը ո'չ հնարավորություն ունի, ո'չ էլ հավես նման բաների հետևից ընկնելու համար:

Այվազյանը նաև նկատել է, որ մեկը լինի իր հալը հարցնի: Իսկ նրա տրտունջներին ի պատասախան Խաչատրյանը փորձել է ապավինել իր սուր հումորին՝ ասելով. «էսօր մենակ անխելքները փող ունեն, իսկ մեր նման խելոքները այ տենց անփող էլ կմնան»:

Այնուհետև Խաչատրյանը որպես իր խոսքի վերջաբան կարծիք է հնչեցրել, որ Հայաստանում շուտով բոլոր պատգամավորները աղքատանալու են, քանի որ 2013–ի ընտրություններին «սաղին» մաղով անցկացնելու են:

Իսկ Այվազյանի հայտնած դիրքորոշմանը «ինադու» Խաչատրյանը իրեն չի կորցրել` հավելելով, որ եթե իրեն պետք լինի` շատերին կբերի իր դաշտ, քանի որ էդքան հարգանք ու պատիվ ունի` ի տարբերություն ուրիշների: