«Ժողովուրդ». ԱԺ պատգամավորը որոշել է Սահմանադրությունում փոփոխություն մտցնել

«Ժողովուրդ»-ի տեղեկություններով' ՀՀ ԱԺ ամենաերիտասարդ պատգամավոր Հայկ Գրիգորյանը, որը թիվ 37 ընտրատարածքից էր ընտրվել, որոշել է ՀՀ Սահմանադրության 4-րդ հոդվածում փոփոխություն մտցնել:

Քանի որ Գրիգորյանի «հովանավորյալը» Սյունիքի մարզպետ Սուրեն Խաչատրյանն է, վերջերս նա իր մոտ է կանչել երիտասարդ պատգամավորին և հետաքրքրվել, թե ինչ է որոշել անել ԱԺ-ում: Գրիգորյանն էլ ոգևորված հայտարարել է, թե «Սահմանադրության 4-րդ հոդվածում սխալ կա, փոխելու եմ»:

Մարզպետն ուրախացել է, որ իր թեկնածուն արդեն սկսել է աշխատել, ու անգամ իր շրջապատին պատմել է, թե Հայկը շուտով Սահմանադրությունում փոփոխություն է անելու:

Թերթը հիշեցնում է, որ սահմանադրական փոփոխություններն իրականացվում են միայն հանրաքվեի միջոցով, ինչի մասին պատգամավորը հավանաբար չի իմացել: Իսկ 4-րդ հոդվածը վերաբերում է հանրապետության նախագահի, Ազգային ժողովի, տեղական ինքնակառավարման մարմինների ընտրություններին, ինչպես նաև հանրաքվեներին, որոնք անցկացվում են ընդհանուր, հավասար, ուղղակի ընտրական իրավունքի հիման վրա՝ գաղտնի քվեարկությամբ:

«Ժողովուրդ»-ը փորձել է Աժ պատգամավոր Հայկ Գրիգորյանից պարզել, թե ինչ սխալ է հայտնաբերել Սահմանադրության հոդվածի մեջ, սակայն նա հերքել է թերթի տեղեկությունը: «Չէ, ճիշտ չէք»,-ասել է Գրիգորյանն ու անջատել հեռախոսը:

Ի դեպ, թերթի տեղեկություններով՝ Հայկ Գրիգորյանն իր հովանավորյալից մի մեքենա է նվեր ստացել, որպեսզի մասնակցի ԱԺ նիստերին: