Ամենահարուստ մարդիկ արժանի՞ են իրենց ունեցվածքին

Global Scan միջազգային հետազոտական կենտրոնը հարցում է կատարել 23 երկրների շուրջ 12,000 մարդկանց շրջանակում՝ պարզելու, թե բնակչությունն ինչպես է վերաբերվում ամենահարուստ մարդկանց եկամուտների աղբյուրների արդար լինելուն: Հարցման արդյունքում պարզվել է, որ հարցվածների մոտ 39%-ը գտնում է, որ իրենց երկրի հարուստներն արժանի են իրենց ունեցվածքին (ձեռք են բերել արդար ճանապարհով) :

Ամենաբարձր եկամուտ ստացողներն ավելի շատ են քննադատության ենթարկվում, քանի որ նրանց եկամուտներն ու ժամանակակից տնտեսության վիճակը հակադիր են միմյանց՝ նրանց հարստությունների չափը գնալով ավելանում է, իսկ տնտեսության վիճակն, ընդհակառակը՝ վատանում:

Եվրոպացիները և լատինաամերիկացիները նույն կերպ են վերաբերվում հարուստներին, իսկ անգլոսաքսոններն ավելի մեղմ վերաբերմունք ունեն: Հիմնական տարբերությունը, ամենայն հավանականությամբ, առկա տնտեսությունների տարբերություններն են:

Չինաստանում, որտեղ ավելի քան 600 մլն. մարդ հազիվ է դուրս եկել աղքատության ճիրաններից, նույնպես մտածում են, որ իրենց երկրի ամենահարուստ մարդիկ արդար ձևով են հասել իրենց ունեցվածքին: Ռուսաստանում, սակայն, որտեղ տնտեսությունը գտնվում է օլիգարխիայի ձեռքում, և որոնց ձեռքում է գտնվում տնտեսության ճյուղերի մեծամասնության ղեկավարումը, բնակչության միայն 16%-ն է կարծում, որ ամենահարուստ մարդկանց ունեցվածքներն արդար ճանապարհով են ձեռք բերվել: