Մեկնարկել է Երիտասարդ ռեժիսորների VI հանրապետական փառատոնը

ՀՀ մշակույթի նախարարության աջակցությամբ՝ Հայաստանի թատերական գործիչների միությունը  նոյեմբերի 23-30-ն Երևանում անցկացնում է Երիտասարդ ռեժիսորների VI հանրապետական փառատոնը: Առաջին անգամ փառատոնը անցկացվել է 2006 թ.-ին: Փառատոնը հիմնադրվել է ՀԹԳՄ կողմից, ՀՀ ժողովրդական արտիստ, պրոֆեսոր Երվանդ Ղազանչյանի նախաձեռնությամբ:

Փառատոնի գլխավոր նպատակն է ներկայացնել երիտասարդ ռեժիսորների նոր բեմադրությունները` բացահայտելով նոր անուններ (փառատոնին կարող են մասնակցել մինչև 35 տարեկան ռեժիսորներ):
Այս տարի Երիտասարդ ռեժիսորների VI հանրապետական փառատոնում կներկայացվի 9 ներկայացում, այդ թվում, 2-ը՝ մարզային թատրոններից. Գյումրու Վ. Աճեմյանի անվան պետական դրամատիկական թատրոնը հանդես կգա բեմադրիչ Լյուդվիգ Հարությունյանի «Բլեզ» ներկայացումով, իսկ Վանաձորի Հովհաննես Աբելյանի անվան դրամատիկական թատրոնը` բեմադրիչ Սարգիս Մանուկյանի «Խիստ սիրահարված տաքսիստը» ներկայացումով: 
Թատերասեր հանրության դատին կհանձնվեն՝ երիտասարդ ռեժիսորներ Գոռ Մարգարյանի «Լյուսիեն Լյուկ», Զարուհի Անտոնյանի «Թևավորը», Իրա Հարությունյանի «Գայլն ու յոթ ուլիկները», Լիլիթ Մելիքյանի «Մահը թակում է դուռը», Գոհար Փոքրիկյանի «Ուրիշ մարդը», Հենրի Քոչարյանի «Զգուշացեք, կանայք են», Սամսոն Մովսիսյանի «Քիթը» բեմադրությունները: 
Ներկայացումներից հետո կանցկացվեն թատերական քննարկումներ: