«Անտիսաշիկն» ավարտվեց, հիմա՝ հանուն Սաշիկի

Parliamentmonitoring-ի հետ զրույցում ՃՈ պետի նախկին տեղակալ, ԱԺ «Իմ քայլը» խմբակցության պատգամավոր Արմեն Խաչատրյանը հերքել է տարածված և նույնիսկ չգրված ճշմարտություն դարձած այն պնդումը, որ արագաչափերի բիզնեսը պատկանում է Սերժ Սարգսյանի եղբորը՝ Սաշիկ Սարգսյանին:

Հասարակության հիշողության մեջ դեռ թարմ է հեղափոխության օրերին ընդդիմության առաջնորդ Նիկոլ Փաշինյանի և նրա համախոհների կողմից իրականացված ակցիան, երբ Փաշինյանը արագաչափ սարքերը շարքից հանելով, բարևներ էր փոխանցում Սաշիկ Սարգսյանին: Ակցիան նույնիսկ անուն ստացավ՝ «Անտիսաշիկ»: Հիմա ի՞նչ է ստացվում՝ Նիկոլ Փաշինյանի թիմակիցը ակամայից ընդունում է, որ հեղափոխության օրերին ընդդիմության առաջնորդի կողմից առաջ քաշված թեզերի 90 տոկոսը մի՞ֆ է:

Եթե դա այդպես է, ապա Խաչատրյանին շատ արագ կսարքեն «քավության նոխազ», և նա խնդիրներ կունենա քաղաքական թիմում: Սակայն կա նաև այլ տարբերակ. չի բացառվում, որ Սաշիկ Սարգսյանի նկատմամբ իր նախկին դիրքորոշումը փոխել է նաև Նիկոլ Փաշինյանը, հետևաբար. նաև իր թիմակիցներն են առաջնորդվում այդ տրամաբանությամբ՝ փորձելով Սաշիկ Սարգսյանին մաքրել այն նույն մեղքերից, որոնց մեջ հենց իրենք էին նրան ժամանակին մեղադրում:

Ս,Խաչատրյան