Ուսամա բին Լադենի նախկին խոհարարը վերադարձել է Սուդան

«Ալ-Կաիդա» ահաբեկչական կազմակերպության առաջնորդ Ուսամա բին Լադենի նախկին խոհարար Իբրահիմ ալ-Կոսին ազատ է արձակվել Գուանտանամոյի ամերիկյան բազայից և վերադարձել Սուդան, հաղորդում է Associated Press-ը։

Սա առաջին դեպքն է, երբ «Ալ-Կաիդայի» անդամը, դատապարտված Բարաք Օբամայի վարչակազմի ռազմական ատյանի կողմից, ետ է ուղարկվել է հայրենիք։ Վերջիններս նման որոշում են կայացրել՝ ելնելով այն հանգամանքից, որ ալ-Կոսին խոստովանել է իր մեղքը և տվել համապատասխան ցուցմունքներ։

2010–ի հուլիսի 7-ին ալ-Կոսին խոստովանել էր, որ աջակցել է ահաբեկչական դավադրություններին։ Իր խոսքերով՝ Բին Լադենի ճամբարում նա կատարել է տարբեր գործառույթներ, մասնավորապես՝ զբաղվել խոհարարությամբ։ Այդուհանդերձ, նա պնդել է, որ ոչինչ չի իմացել ԱՄՆ-ում «Ալ Կաիդայի» ահաբեկչական գործողությունների նախապատրաստման մասին։