Քոչարյանի թափանցիկ ակնարկը՝ ՀՅԴ-ին

Երկրորդ նախագահ Ռոբերտ Քոչարյանն իր համախոհներին եւ համակիրներին ուղերձ է հղել բանտից: Եվ գլխավոր հարցը այստեղ թերևս այն է, թե ինչն է ստիպել Քոչարյանին հանդես գալ նման ուղերձով, և այն, թե իրականում ո՞ւմ էր այդ ուղերձն ուղղված: Դժվար թե իր համախոհներին գոտեպնդելու համար երկրորդ նախագահը հանդես գար հանրային ուղերձով, քանի որ կարող էր դա անել նաև ներքին կարգով: Իր մասին հիշեցնելու խնդիր Քոչարյանը նույնպես չունի, հետևաբար, մնում է ենթադրել, որ Քոչարյանի ակնարկը՝ իր՝ քաղաքականության մեջ մնալու և Նիկոլ Փաշինյանի իշխանության կարճատև գոյության մասին՝ ուղղված է քաղաքական դաշտի այն խաղացողներին, որոնք կարող են դեպի այդ իշխանությունը կողմնորոշվելու որոշում կայացնել:

Օրերս Նիկոլ Փաշինյանը հայտարարել էր խորհրդարանից դուրս մնացած ՀՅԴ հետ  համագործակցելու պատրաստակամության մասին: Ընդ որում՝ Փաշինյանի այս հայտարարությունն անսպասելի էր հենց դաշնակցականների համար, որոնք այս օրերին Արցախում Բյուրոյի նոր կազմ էին ընտրում: ՀՅԴ-ն գնում է ռեբրենդինգի և փորձում է հարմարվել նոր իրավիճակին, միևնույն ժամանակ, դեռևս առկա է այն կարծիքը, որ Քոչարյանի՝ ակտիվ քաղաքականություն վերադառնալու պարագայում վերջինիս քաղաքական հենարանը լինելու է հենց ՀՅԴ-ն:

Փաշինյանի համագործակցության առաջարկությանը որևէ պաշտոնական արձագանք դեռևս չկա, և ահա հենց այս պահին Ռոբերտ Քոչարյանը կարիք է զգում հիշեցնել՝ ինքը դեռ խաղի մեջ է: Կարելի է ենթադրել, որ երկրորդ նախագահի ուղերձի գլխավոր հասցեատերը հենց ՀՅԴ-ն է, որին Քոչարյանը զգուշացնում է՝ Փաշինյանի իշխանությունը ժամանակավոր երևույթ է, հետևաբար, վերջինիս համագործակցության առաջարկին պատասխանելիս ՀՅԴ պետք է յոթ մտածի՝ մեկ կտրի, Փաշինյանի սիրաշահմանը տրվելուց առաջ…