Թուրքամետ կոնգրեսականի գրասենյակը ջնջել է Հայոց ցեղասպանության վերաբերյալ հատվածը

ԱՄՆ–ի 33 թուրքամետ կոնգրեսականների գրասենյակները, այդ թվում ԱՄՆ–ի Հանրապետական կուսակցության ներկայացուցիչ, Ցինցինատիից ընտրված կոնգրեսական Ջին Շմիդտի գրասենյակը իրենց ղեկավարների Վիքիպեդիայի էջերում սրբագրումներ են կատարել։ Նրանք կոնգրեսակնների էջերից հանել են «Հայոց ցեղասպանության ժխտման հարց» բաժինները, հաղորդում է Cincinnati.com–ը։

Ըստ հրապարակման, Շմիդտը վաղուց ծառայում է թուրք–ամերիկյան բարեկամական խմբի շահերին՝ հանդես գալով Հայոց ցեղասպանության ճանաչման օրինագծի դեմ։ Շմիդտի դիրքորոշման վերաբերյալ լուրջ քննադատության է ենթարկել նրա քաղաքական հակառակորդ Դավիդ Կրիկորյանը։ Ամերիկահայ քաղաքական գործիչը Շմիդտին մեղադրել է թուրքական «արյունոտ փողեր» վերցնելու մեջ, որոնք ուղղված են թուրքական շահերը ԱՄՆ–ում ներկայացնելուն։

Կրիկորյանը բողոք է ներկայացրել Ներկայացուցիչների պալատի էթիկայի հարցերով հանձնաժողովին, որը եկել է այն եզրակացության, որ Շմիդտը կանխամտածված չի վերցրել ԱՄՆ–ում թուրքական շահերը ներկայացնող լոբբիստական խմբերից տրված նվերները։ Հենց այդ լոբբիստական խմբերը լուրջ ֆինանսական աջակցություն են ցույց տալիս Շմիդտին՝ Կրիկորյանի դեմ դատական հայց ներկայացնելու և զրպարտելու մեղադրանքով նրա դեմ մեղադրանք առաջադրելու նպատակով։

Սակայն հայտնի չէ՝ երբ է Շմիդտի գրասենյակը ջնջել այդ բաժինը, որն այս պահին արդեն վերականագնված է։

Տեղի իշխանությունները դիմել են Շմիդտի գրասենյակ՝ տեղի ունեցածի վերաբերյալ մեկնաբանություն ստանալու պահանջով։