Իսպանացի գիտնականները հայտնաբերել են նորքարեդարյան ամենահին աղեղը

Իսպանացի հնագետները Բարսելոնայի մոտակայքում հայտնաբերել են 7.5 հազար տարվա վաղեմության աղեղ: Տվյալ պահի դրությամբ սա նորքարեդարյան ժամանակաշրջանի ամենահին նմանատիպ զենքն է: Այս մասին ասվում է Բարսելոնայի համալսարանի կայքեջում:

Գտածոն հայտնաբերվել է Բարսելոնայից ոչ հեռու գտնվող Բանյոլաս լճի ափին՝ Լա Դրագա (La Draga) կայանատեղում, որն Իբերական թերակղզու նեոլիթյան ամենահին կայանատեղիներից է:

Աղեղը պահպանվել է ամբողջությամբ: Այն ունի կիսակլոր տեսք և 108 սանտիմետր երկարություն: Հնագետների կարծիքով՝ աղեղը պատրաստվել է մ.թ.ա. 5400-5200 թվականներին:

Ամենահին պահպանված նմուշները համարվում են Դանիայի քաղաքներից մեկում հայտնաբերված աղեղները: Դրանք ստեղծվել են մ.թ.ա. 9000-8000 թվականներին: Այս նմուշները, սակայն, վերաբերում են հին քարի դարին (պալեոլիթ):

Այսպիսով, իսպանացի հնագետների կողմից հայտնաբերված աղեղը կարող է համարվել ամենահինը նեոլիթյան ժամանակաշրջանի եվրոպացի հողագործներին պատկանող զենքերի շարքում: