Լիդիանը կպարգևատրի՞ Էրիկ Գրիգորյանին

Վերլուծական 2 Փետրվար, 2019 14:00

Բնապահպանության նախարար Էրիկ Գրիգորյանը լրագրողների հետ զրույցում չի թաքցրել, որ իր գերատեսչությունում ևս եղել են տարեվերջյան պարգևատրումներ, ավելին՝ Գրիգորյանը հետևելով իր քաղաքական թիմի այլ անդամների վարակիչ օրինակին՝ պարգևատրել է նաև ինքն իրեն: Քանի որ նախարարի աշխատանքից ակնհայտ երևում է, որ վերջինս կառավարությունում ներկայացնում է ոչ այնքան բնության պաշտպանների, որքան օրինակ իր նախկին գործատու՝ Լիդիան Արմենիայի շահերը, ապա կարող ենք ենթադրել, որ իր տքնաջան աշխատանքի դիմաց նախարարը նաև Լիդիանից է պարգևատրում ստացել:

Ինչ արժե թեկուզ միայն այն փաստը, որ անցած տարվա սեպտեմբերին Ամուլսարում Կարմիր գրքում գրանցված բույսի և թիթեռի առկայության փաստը ստուգելու նպատակով նախարարի հրամանով ստեղծված աշխատանքային խմբում նա ընդգրկել էր տարիներ շարունակ վճարովի հիմունքներով Լիդիանի համար կենսաբազմազանության ուսումնասիրություններ և հաշվետվություններ գրած երկու գիտնականի։

Էրիկ Գրիգորյանը հանքաարդյունաբերության ջատագով է, և ըստ երևույթին նրա նախասիրությունները չեն փոխվել նաև նախարարի պաշտոնին վերանշանակվելուց հետո: Տեղեկությունը, որ նախարարությունը Ջերմուկում նոր ՀԷԿ-ի կառուցման թույլտվություն է տրամադրել այդպես էլ չհերքվեց, հետևաբար կասկածի տակ են առնվում Գրիգորյանի մինչ այս արված բոլոր հավաստիացումները, որ առաջնային է համարվելու բնության շահը: Բացի այդ, ճնշումներ են սկսվել Ջերմուկ համայնքի ավագանու վրա` համայնքի բնակիչների 3000 ստորագրությունների վրա հիմնված հանրագրին հավանություն տալու՝ Ջերմուկում մետաղական հանքարդյունաբերությունն արգելելու և համայնքն էկո-տնտեսական տարածք հայտարարելու կապակցությամբ:

Նախարարի մեկ այլ հավաստիացում, որ ամեն ինչ արվելու է, որպեսզի դադարեցվի լրացուցիչ ջրառը Սևանա լճից նույնպես կարելի է դասել սին խոստումների թվին: Ջռարը ոչ միայն կա, ավելին՝ այն կատարվում է շատ ավելի մեծ մասշտաբներով: Իսկ Սևանից դուրս բերվող սիգի պաշարների մասին ավելորդ է անգամ նշել, նախարարությունը այն աստիճան «պատշաճ» վերահսկողություն է իրականացրել վերոնշյալ հարցում, որ մայրաքաղաքի փողոցները ողողվել են սիգով: Նախարարը նաև խոստացել էր, որ բոլոր հանքերը ստուգվելու են: Կարծում ենք՝ մեկնաբանությունները ավելորդ են…