«Հայկական Ժամանակ». Մոտ 7 հազար փուչիկներում մեթան տեսակի գազ է լիցքավորված եղել

Օրերս ՀՀ ոստիկանության քննչական գլխավոր վարչության ՀԿԳՎ-ն ստացել է Հանրապետական կուսակցության նախընտրական քարոզարշավի վերջին համերգ-հանրահավաքի ժամանակ գազով լիցքավորված փուչիկների պայթյունի վերաբերյալ փորձաքննության եզրակացությունը:

Նշված վարչության ՀԿԳՎ ղեկավար Արսեն Այվազյանը երեկ թերթի թղթակցին հայտնել է դրա արդյունքների մասին: Զրույցը ստորև.

-Ճիշտ է, բոլորն էլ ենթադրում էին, բայց առանց փորձաքննության վերջնական արդյունքների նախաքննական մարմինը չէր կարող հայտարարություն անել, բայց քանի որ ձեռքի տակ արդեն ունենք եզրակացություն, կարող ենք ասել՝ այո, իրականում մեթան տեսակի գազ է լիցքավորված եղել փուչիկներում, բոլոր՝ մոտ 7 հազար փուչիկներում:

-Հայտնի՞ է, թե որտեղ էին փուչիկները լիցքավորվել:

-Լիցքավորման մասով մենք լրացուցիչ հրապարակում կունենանք: Արդեն պարզ է, թե ովքեր են լիցքավորել, ինչպես և որտեղ է լիցքավորվել: Դա պարզ է, պարզապես այսօր բավարարվենք զուտ եզրակացությամբ, հետո լրացուցիչ պրոցեսների ավարտից հետո մյուս տվյալները պարզ կդառնան: Ծխախոտից, ըստ եզրակացության, նման պայթյուն չէր առաջանա: Եզրակացության մեջ ուղղակիորեն գրված է, որ պայթյունը տեղի է ունեցել բաց կրակի ներգործությամբ:

-Փորձաքննության արդյունքները ստացվեցին: Այժմ ի՞նչ գործողություններ եք անելու:

-Նախատեսված են շատ գործողություններ, բայց որպեսզի չթվարկեմ դրանք, ասեմ, որ նախաքննությունը շարունակվում է, մասնավորապես կատարվում են փորձաքննության եզրակացությունից բխող անհրաժեշտ գործողություններ:

-Այսպես հարցնեմ, փորձաքննության արդյունքից կարելի՞ է եզրակացնել, թե ով է պայթյունի պատասխանատուն և մեղավորը:

-Այս եզրակացությունը այլ եզրակացությունների հետ համակցության մեջ գնահատելով՝ մենք սրանից բխող այլ քննչական գործողությունների արդյունքում, արդեն իրավական գնահատականի մասով, կսկսենք որոշակի գործընթաց, ձեր ասած՝ ով էր մեղավոր, ով մեղավոր չէր հարցում: Միայն այս եզրակացությունը դրա համար բավարար չէ:

-Այս փորձաքննության արդյունքները ստանալով' նախաքննությունը մոտեցա՞վ ավարտական փուլին, թե՞ ընդամենը մեկ քայլ առաջ գնաց:

-Ես կասեի՝ մի քանի քայլ առաջ գնաց, որովհետև հիմա արդեն հաստատված հանգամանքներ ունենք, և բավականին առաջ գնաց քննությունը՝ արդյունքների ձեռքբերման մասով: Կարծում եմ, արդեն ավելի արագ առաջընթաց կունենանք:

-Պարոն Այվազյան, այս պահի դրությամբ այս քրեական գործում կասկածյալի կամ մեղադրյալի կարգավիճակով մարդ կա՞:

-Այս պահի դրությամբ քրեական գործով կասկածյալ կամ մեղադրյալ դեռ չունենք:

Փաստորեն, արդեն ապացուցված է, որ ի սկզբանե փուչիկների մեջ վտանգավոր գազ է եղել, հետևաբար՝ պարզ է նաև, որ պետք է պատասխանատվության ենթարկվի այն անձը, որը կանխամտածված հանցագործություն է կատարել՝ հրապարակ է բերել պայթյունավտանգ փուչիկները, և այս դեպքում արդեն երկրորդական հարց է, թե ով է լուցկի վառել փուչիկների մոտ:

Իսկ պայթյունի հետևանքով այրվածքներ ստացած երիտասարդներից մեկը թերթի թղթակցի հետ զրույցում իր վրդովմունքն է հայտնել, որ մինչ օրս մեղավորները պատժված չեն: «Ճշմարտությունն ու արդարությունը ոչ ոքի պետք չեն»,- ասել է նա: