«Առավոտ». Վարչապետն ինչո՞ւ է մեյդան ընկնում. Հրանտ Բագրատյան

Երեկ Ազատության հրապարակում ԱԺ պատգամավոր Հրանտ Բագրատյանի ու նրա ընտրողների հերթական հանդիպման օրն էր: Պարոն Բագրատյանի համախոհները իրենց հետաքրքրող հարցերն էին տալիս: Հավաքվածներից մեկը հետաքրքրվեց՝ ինչքա՞ն է գազի ներկրման իսկական սակագինը. «150 դոլար գրում են, 230 գրում են, ո՞րն է իսկական գինը»:

Պարոն Բագրատյանն էլ ասաց, որ նշված բոլոր թվերն էլ ճիշտ չեն.«Մեր գազի գինն է 406 դոլար, մեր պետությունը՝ Արմեն Մովսիսյանի բերանով, ահավոր չեմ հարգում, ասում է՝ մեզ տալիս են 180-ով կամ 230-ով… բայց այդ մարդը, վստահ եմ, գնում է ռուսներին ասում է, գնացել եմ՝ էլի բարձրացրեք: Այնտեղ աչք է մտնում, որ շահ, վարձատրություն ստանա: Չեմ կասկածում, ինչպես ամերիկացիների, այնպես էլ ռուսների օգտին աշխատող հայ պաշտոնյաները ամեն ջանք ու եռանդ թափում են, որ մտնեն նրանց, այսպես ասած, մի լավ տեղ ու իրենց տաք զգան»:

Պարոն Բագրատյանին զարմացնում են նաև էներգետիկայի և բնական պաշարների նախարար Արմեն Մովսիսյանի խոսքերը, թե գազի սակագինը քննարկում են Ռուսաստանի հետ, քննարկումից հետո կասեն.

«Ասում է ՝ քննում ենք, գազի գինը կասենք: Դու քննելու ի՞նչ ունես, դու գա՞զ ես առնում: Գազն ո՞վ է առնում, ումի՞ց… Հարց է ծագում՝ Արմեն Մովսիսյանն այստեղ ի՞նչ կապ ունի, ինչո՞ւ է մեյդան ընկնում, վարչապետն ինչո՞ւ է մեյդան ընկնում: Նախագահն ինչո՞ւ է գնում, խնդրում Ռուսաստանի նախագահին՝ մի քիչ էժանացնես: Գնալու կարիք չկա»: