Անբարվոք ընտրատեղմասեր ԼՀՂ-ում. ի՞նչ է ասում ԿԸՀ-ն

Lurer.com-ը վերջերս համացանցում հայտաբերել էր ԼՂՀ Մարտունու գյուղերից մեկի թիվ 25 ընտրատարածքի լուսանկարը, որում ցայտուն երևում է ընտրատարածքի անբարվոք վիճակը։ Մտահոգվելով ընտատեղամասի վթարային վիճակի մասին՝ Lurer.com-ը զանգահարել է ԼՂՀ-ի ԿԸՀ-ի ներկայացուցիչ Ռայա Նազարյանին պարզաբանում ստանալու նպատակով։ Վերջինս ասել է, որ ընտրատեղամասը տեղակայված է Ննգի գյուղի ակումբում։

«Այո՛, ճիշտ եք, ընտրատեղամասի արտաքին տեսքը նորոգման ենթակա է, իսկ շենքի վթարային լինելը մենք անպայման կպարզենք», ասել է ԿԸՀ-ի ներկայացուցիչը։

Այն հարցին, թե ինչպես են ընտրվում ընտրատեղամասերը և արդյոք ստուգվում է դրանց վթարային լինելը, Ռայա Նազարյանը պատասխանեց.

«Ընտրական տեղամասերն ու տեղամասային կենտրոնները ընտրվում են հետևյալ կերպ. համայնքի ղեկավարը, ոստիկանության և տարածքային հանձաժողովի ներկայացուցիչներն ընտրությունից 45 օր առաջ ստուգայց են կատարում, եթե տվյալ շինությունը վերանորոգման կարիք ունի, ապա վերանորոգման համար ֆինանսավորում է հատկացնում, և մինչև ընտրությունների օրը ընտրատեղամասը վերանորոգվում է։ Իսկ ինչ վերաբերում է ձեր կողմից նշված ընտրատարածքին, ապա կարծում եմ, որ այն նույնպես կվերանորոգվի մինչ ընտրության օրը»։

Հիշեցնենք, որ Արցախի նախագահական ընտրությունները տեղի են ունենալու հուլիսի 19-ին։