«Սաշիկի միլիոնները» մնացին կես ճանապարհին. Փաշինյանի հույսը ՀԴՄ խփողներն են

 

Եթե մի կողմ դնենք ասվածի աբսուրդայնության մակարդակը, ապա պետք է փաստել, որ վարչապետը անհաջող փորձ է կատարել՝ ցույց տալու բյուջեի սնանկությունը: Այսինքն, եթե մարդիկ օրենքի տառին համապատասխան ՀԴՄ խփեն, այդ գումարները կմտնեն բյուջե, հարկերը կհավաքագրվեն ու կիսաքանդ շենքերն ու շինություններն էլ կվերանորոգվեն: Ի՞նչ է ստացվում՝ ամեն օր բյուջեն միլիարդներով համալրելու մասին հայտարարող վարչապետն ընդունում է, որ այդ բյուջեն այնքան սուղ է, որ պետությունը իր գործառույթները կատարելու համար հույսը դրել է ՀԴՄ խփողների վրա՞: Դա էլ դեռ քիչ է՝ «դրակոնյան» հարկերով ցանկանում է խեղդել փոքր ու միջին բիզնեսը, թերևս ենթադրելով, որ այդպես ՀԴՄ-ն ավելի հոժարակամ կտրամադրեն:

 

Եթե առաջ Փաշինյանը հայտարարում էր, որ բյուջեն չի հերիքում, որովհետև 50%-ը մտնում է Սաշիկի գրպանը, ապա հիմա այդ 50%-ը չի գողացվում, համենայն դեպս, մեզ այդպես փորձում են համոզել: Բացի այդ, ըստ նոր իշխանությունների` իրենց հակակոռուպցիոն ակտիվ պայքարի արդյունքում նախկին համակարգի թալանչի և ապօրինի հարստացած, ասֆալտներին փռած պաշտոնյաների փողերը գետի պես հոսում են պետական բյուջե: Եթե բյուջեն այդքան դզված է, ինչո՞ւ է վարչապետը հաթաթա տալիս ՀԴՄ չխփողներին, և, ինչն էլ ավելի կարևոր է, ինչպե՞ս է ստացվում, որ նոր Հայաստանում դեռևս կան տնտեսվարողներ, որ «դուխ» են անում իրենց օրենքի շրջանակներից դուրս դնել և ստիպում են Փաշինյանին ընդունել՝ իրավիճակը դուրս է գալիս նրա վերահսկողությունից…