«Չորրորդ ինքնիշխանություն». «Առա՛ջ, դեպի Անսերժ Հայաստան»

Թերթը գրում է. ««Հայ ազգային կոնգրեսի գործունեության և ժողովրդական զանգվածների գերհամախմբման կիզակետը դառնալու են առաջիկա փետրվար–մարտ ամիսները». երեկ Ազատության հրապարակում ՀԱԿ հանրահավաքի ժամանակ հայտարարեց ՀՀ առաջին նախագահ, ՀԱԿ առաջնորդ Լևոն Տեր–Պետրոսյանը։

Ըստ նրա՝ մինչև գարուն Կոնգրեսն իր ջանքերը կենտրոնացնելու է գլխավորապես մարզերում տարվող աշխատանքի և տարածքային կառույցների գործունեության ակտիվացման վրա, և այդ գործն արդեն իսկ ընթացքի մեջ է։ Ընդդիմության հաջորդ հանրահավաքը տեղի կունենա փետրվարին՝ կոնկրետ օրը ՀԱԿ–ը լրացուցիչ կհայտարարի։ «Բայց քանի որ, ինչպես արդեն նշել եմ, միապաղաղ թվացող իրավիճակը կարող է փոխվել ցանկացած պահի՝ կապված ոչ միայն հավանական, այլև բոլորովին անսպասելի որևէ իրադարձության հետ, ուստի բացառված չէ, որ հաջորդ հանրահավաքը տեղի ունենա նույնիսկ ավելի վաղ»,– զգուշացրեց Տեր–Պետրոսյանը և հավելեց. «Մաղթում եմ՝ լավ տրամադրությամբ դիմավորել Նոր տարին և Սուրբ ծնունդը, ձեզ ցանկանալով ամենայն բարիք։ 2012 թվականը թող դառնա հույսի ու արժանապատվության վերականգնման և ձեր բոլոր անձնական ու հավաքական իղձերի կատարման տարի։ «Առա՛ջ, դեպի անսերժ Հայաստան»»։