Ես զրուցում եմ քեզ հետ, ՄԱՐԴ. Մհեր Ենոքյան

Այսօր Երևանի Գրողների միության շենքում տեղի ունեցավ ցմահ դատապարտյալ Մհեր Ենոքյանի «Ես զրուցում եմ քեզ հետ, ՄԱՐԴ» երկլեզու գրքի շնորհանդեսը։ Վաճառքից ստացված շահույթը Մհեր Ենոքյանը կնվիրաբերի քաղցկեղով հիվանդ երկու երեխաների բուժմանը։ Գրքում ներկայացված են հեղինակի հիշողությունները, հոդվածներ, որտեղ խոսում է հասարակության համատարած անտարբերության և իրավական դաշտի ներկայիս թերացումների մասին։ Սա կիսավավերագրական, կիսագեղարվեստական գիրք է։

Գրքի մասին առանձնակի հուզմունքով է խոսում հայագետ, կինոգետ և պատմաբան Արծվի Բախչինյանը, ով գիրքն իր տեսակի մեջ համարում է բացառիկ։

«Այդ գիրքը ձեռքդ վերցնելու դեպքում մեծ լիցք ես ստանում։ Թեկուզ հարևանցի նայելիս զգում ես նրա մարդասիրությունն ու զգայնությունը։

Ծանր պայմանները Մհերին չեն կոտրել, 20 տարեկանից հայտնվել է բանտում, բայց պահպանում է իր տեսակը, ձեռքին միայն գրիչ է պահում և անընդհատ ստեղծագործում է՝ նկարում է, գրում, քանդակում, առանց համակարգչի համացանցում բլոգ է վարում։ Հետևելով նրան՝ անգամ իր բանտախցի ընկերները չեն ծխում։

Ինչքան փորձել եմ հանդիպել նրան, երբեք չեմ կարողացել, համապատասխան ուժերը նպատակահարմար չեն գտնում իմ հանդիպումը նրա հետ։

Պայքարում ենք, որ մեր իրավական դաշտը խոստովանի, որ սխալ է թույլ տվել, որպեսզի Մհերն ազատ արձակվի։ Այդ գիրքը, կարծում եմ, բացի հասարակական հարցեր վեր հանելու առաքելությունից, իսկապես գեղարվեստական արժեք է և ցույց է տալիս, որ մենք գործ ունենք գրչի մարդու հետ։ Նրա ճակատագիրը պետք է մտահոգի բոլորին», - ասել է Արծվի Բախչինյանը։