Մեծ Բրիտանիայում հայտնաբերվել են «ֆրանկենշտեյն» մումիաներ

Բրիտանական հնագետները հայտնաբերել են ֆրանկենշտեյն-մումիաներ։ Հետազոտողների հոդվածը լույս է տեսել The Journal of Archaeological Science պարբերականում, որի համառոտ բովանդակությունը բերում է LiveScience-ը։

2001 թվականի պեղումների ժամանակ Շոտլանդիայի ծովափնյա հատվածից ոչ հեռու գտնվող կղզիներից մեկում հետազոտողները հայտնաբերել էին մի քանի մումիֆիկացված մարմին։ Հայտնագործությունն արվել է 3000-ամյա մեծ շինության հիմքում։

Աճյունների վերաբերյալ նոր աշխատանքի շրջանակներում գիտնականները հետազոտել են երկու մումիա՝ տղամարդու և կնոջ։ Պարզվել է, որ երկու մումիաներն էլ բաղկացած են տարբեր մարդկանց մարմնի մասերից, տղամարդունը՝ առնվազն երեք, իսկ կնոջը՝ առնվազն 4 մարդու։ Այս հանգամանքը հաջողվել է պարզել ԴՆԹ-ի վերլուծությամբ և մնացորդների քննությամբ։ Մասնավորապես, որոշ ոսկորների վրա հայտնաբերվել են արտրիտի նշաններ, մյուսների վրա՝ ոչ։

Մումիֆիկացիայի առանձնահատկություններից ելնելով՝ կարելի է ասել, որ այն տեղի է ունեցել պեղումների վայրից ոչ հեռու գտնվող ճահճուտներում։ Ռադիոածխածնային վերլուծությունը թույլ է տվել պարզել, որ մարդկանց մահվանից մինչև շինության հիմքում դրանց թաղումը անցել է 600 տարի։ Գիտնականները պնդում են, որ մարմինների վերազուգակցվել են տարբեր ժամանակներում՝ տղամարդկանցը՝ մ.թ.ա. 1440-1260 թվականներին, կանանցը՝ 1310-1130 թվականներին։

Հետազոտողները ենթադրում են, որ «վերազուգակցումը» պատահական չի եղել, այլ կանխամտածված։ Մասնավորապես, այս մասին է վկայում այն, որ տարբեր մումիաներում դա տարբեր ժամանակներում է արվել։ Մարմնի մասերի վերազուգակցումը, գիտնականների կարծիքով, եղել է տոհմերի միացման հետ կապված ծիսական արարողության մի մաս։ Հնարավոր է նաև, որ նախնիների աճյունները հողի սեփականության հաստատման յուրահատուկ «փաստաթղթեր» են եղել։

Հնագետներն ասում են, որ նոր գտածոն կարող է փոխել մեր պատկերացումները Բրիտանական կղզիների հնագույն բնակիչների կողմից մահացածների հանդեպ վերաբերմունքի մասին։ Որպես մեկ այլ օրինակ գիտնականները ներկայացնում են 2009 թվականին պեղված մեկ այլ մումիա, որի ոսկորներում անցքեր էին բացված մարմնի տարբեր հատվածներ թելերով միակցելու համար։