Գուցե ավելի «բեթար» նյութեր էլ լինեն. ԼՂՀ ԿԸՀ

Ավելի վաղ Lurer.com-ը տեղեկություն էր ստացել, որ  ԼՂՀ Գերագույն դատարանի նախագահ Արամայիս Ավագյանը ֆեյսբուքյան իր էջում տարածում է նախագահի թեկնածու Բակո Սահակյանի քարոզչական նյութերը և հանդես գալիս այս թեկնածուի օգտին նախընտրական քարոզչությամբ: 

Այս փաստի առնչությամբ Lurer.com-ը խոսեց ԼՂՀ ԿԸՀ ներկայացուցիչ Ռայա Նազարյանի հետ, ով ծանոթ էր հրապարակմանը։

«Գիտեք ինչ, հիմա մենք չենք կարող ասել, ով է ճիշտ, ով սխալ, այդ տեղեկությունները ընդդիմադիր ԶԼՄ-ներն են հրապարակել, գուցե դրանից ավելի վատ, «բեթար» նյութեր էլ լինեն, զանգեք ուրիշներին, մենք չենք կարող ամեն նյութի հետևից ընկնել»,- նշել է ներկայացուցիչը։

Մեր այն պնդմանը, որ կան լուսանկարներ, որոնք ապացուցում են տեղեկության իսկությունը, Ռայա Նազարյանը արձագանքեց. 

«Ես ձեզ խորհուրդ կտամ ամեն ինչին չհավատալ, ես էլ եմ նայել Արամայիս Ավագյանի ֆեսյբուքյան էջը, բայց ոչ մի նախընտրական քարոզչություն չեմ նկատել։ Մենք միայն ԿԸՀ-ին ուղղված դիմում-բողոքներ ենք քննարկում և ի վիճակի չենք հետևել բոլոր հրապարակումներին։ Իսկ եթե իրոք նման փաստ կա, ապա ինչո՞ւ մյուս թեկնածուն չի բողոքում»։

Իսկ հարցին, թե արդյոք ԿԸՀ-ի կողմից որևէ միջոցներ կձեռնարկվեն՝ դեպքը ուսումնասիրելու և ԼՂՀ գերագույն դատարանի նախագահին պատասխանատվության կանչելու ուղղությամբ, ներկայացուցիչը մեկնաբանեց, որ ինքը նորից կուսումնասիրի, և ամփոփեց զրույցը։

Հակառակ ԼՂՀ ԿԸՀ-ի ներկայացուցիչի պնդմանը՝ թե տեղեկությունը չի համապատասխանում իրականությանը, Lurer.com-ը ներկայացնում է փաստն ապացուցող լուսանկարներից մեկը։