LIBOR-ի մանիպուլյացիայի հետևանքով կարող են տուգանվել ԵՄ 12 բանկեր

Ըստ ամերիկյան Morgan Stanley ներդրումային բանկի կատարած հետազոտությունների՝ LIBOR միջբանկային վարկավորման գործակցի մանիպուլյացիայի մեջ մեղադրվող 12 բանկերը ստիպված կլինեն ներդրողներին և ֆինանսական կարգավորիչներին վճարել 22 մլրդ. ԱՄՆ դոլար: Տուգանքների հետևանքով բանկերի ընդհանուր կապիտալի չափը կիջնի 0.5%-ով:

Տուգանքների չափը կանխորոշելիս Morgan Stanley բանկը հիմնվել է Barclays բանկի համար սահմանած գումարի չափի  վրա. այսինքն՝ 11 մեղադրվող բանկերի համար կսահմանեն այնքան տուգանք, որքան սահմանել էին Barclays բանկի համար՝ 456 մլն. ԱՄՆ դոլար:

Եվրամիության հանձնակատար Խոակին Ալմունիան հայտարարել է, որ LIBOR-ի հետաքննությունը դարձնելու է իր ամենագլխավոր խնդիրը, քանի որ արդեն երկար ժամանակ է, ինչ շարունակվում է տվյալ գործի հետաքննությունը և դեռ չեն կարողանում այդ հարցին լուծում տալ: Տվյալ հետաքննությունը ընթանում է ԵՄ-ի ավելի քան 20 բանկերում: