MI-6-ը 2008-ին տապալել է Իրանի միջուկային ծրագիրը

Բրիտանական հետախուզական ծառայության` MI-6-ի ղեկավար Ջոն Սոերսը հայտարարել է, որ 2008 թվականին իր ղեկավարած ծառայությանը հաջողվել է տապալել Իրանի միջուկային ծրագիրը: Այդ մասին հաղորդում է The Daily Telegraph-ը: MI-6-ի ղեկավարը չի հստակեցրել, թե ինչպես, կամ ինչ չափով է 4 տարի առաջ տապալվել Իրանի միջուկային ծրագիրը, սակայն վստահեցրել է, որ Բրիտանիայի հատուկ ծառայությունները ջանքեր են գործադրում Իրանի կողմից ատոմային ռումբ ստեղծելու օրը հետաձգելու ուղղությամբ:

Ջոն Սոերսը նաև ընդգծել է, որ իր կանխատեսմամբ Իրանը ատոմային ռումբ կարող է ունենալ արդեն 2014 թվականին, ինչը կհանգեցնի այդ երկրի նկատմամբ ԱՄՆ-ի և Իսրայելի կողմից ռազմական գործողության իրականացմանը:

Հիշեցնենք, որ Իրանը բազմիցս մեղադրել է արևմտյան պետություններին և Իսրայելի հատուկ ծառայություններին՝ իր միջուկային ծրագրերը տապալելուն ուղղված գործողությունների մեջ: Մասնավորապես, Իրանում սպանվել էին միջուկային ֆիզիկայի մի քանի մասնագետներ, իսկ ատոմային ծրագրի հետ կապված համակարգիչները խոցվել էին Stuxnet վիրուսով: