«Նարեկացու հետ». գիրք` նվիրված հայկական տպագրության 500-ամյակին

Նոյեմբերի 25-ին  Հայաստանի ազգային գրադարանում տեղի ունեցավ Յուրա Պետրոսյանի կազմած «Նարեկացու հետ» գրքի շնորհանդեսը:

Գրական այս յուրահատուկ հանրագիտակն իր մեջ ամփոփում է Նարեկացու ստեղծագործությունները, նրան նվիրված շուրջ 150 հոդվածներ և նյութեր, 600 լուսանկարներ, պատկեր-խոյակներ, հայաստանյան, կիլիկյան, Վասպուրականի մանրանկարներ, կերպարվեստի գործեր: Ժողովածուում տեղ են գտել նաև նշանավոր գրողների և արվեստագետների ստեղծագործությունները` նվիրված Նարեկացուն և նրա ստեղծագործություններին «Ղևոնդ Ալիշան, Վիլյամ Սարոյան, Մանուկ Աբեղյան, Արշակ Չոպանյան, Հովհաննես Թումանյան, Ավետիք Իսահակյան, Լևոն Շանթ, Մարտիրոս Սարյան, Եղիշե Չարենց, Գարեգին Բ Ամենայն Հայոց կաթողիկոս, Պարույր Սևակ, Մկրտիչ Սարգսյան, Հրանտ Թամրազյան, Աելիտա Դոլուխանյան, Հրաչյա Թամրազյան, Վարագ Առաքելյան, Վարդան Դևրիկյան և ուրիշներ»: Այստեղ են նաև աշխարհի մեծերի` Դանթեի, Գյոթեի, Բախի, Դոստոևսկու խոսքերը Նարեկացու մասին: Առանձին վերնագրերով ներկայացված է Նարեկացին կերպարվեստում, հայկական մանրանկարներում, երաժշտության մեջ և այլն:

Գիրքը կազմված է 27 բաժիններից: «Մուտք» բաժնում կազմողի խոսքն է, Պարույր Սևակի «Գրիգոր Նարեկացին», Գարեգին Բ Ամենայն Հայոց կաթողիկոսի կոնդակը` «Մատյան ողբերգության» պոեմի 1000-ամյակի առթիվ: Մնացած նյութերն ու հոդվածներն ամփոփված են առանձին խորագրերի ներքո` «Կյանքը և ժամանակը», «Նարեկացու աշխարհայացքը», «Բանարվեստի նարեկյան դպրոցը», «Գրիգոր Նարեկացի. ստեղծագործություններ», «Մատյան ողբերգության» պոեմի պատմությունից, «Մատյան ողբերգության» երկի թարգմանությունները», «Երգի արքան: Հատվածներ ստեղծագործություններից», «Գրիգոր Նարեկացի. ներբողներ և տաղեր», «Գրիգոր Նարեկացի. գանձեր», «Սուրբ Աստվածաշունչ և Նարեկ», «Ավանդապատումներ ու զրույցներ», «Համայն մարդկության հոգու բժշկարանը», «Նարեկի հրատարակիչներ ու տպարաններ», «Գրականություն Գրիգոր Նարեկացու մասին», «Խոսք Նարեկացուն. կարծիքներ Գրիգոր Նարեկացու մասին», «Գրիգոր Նարեկացուն նվիրված բանաստեղծություններ» և այլն: 
Գիրքը լույս է տեսել 2011թ., նվիրված է հայկական տպագրության 500-ամյակին: