Այսօր Արցախի հերոս գեներալ Մանվել Գրիգորյանի 56 ամյակն է

Այսօր ԵԿՄ վարչության նախագահ, Արցախի հերոս, գեներալ-լեյտենանտ Մանվել Գրիգորյանի ծննդյան օրն է: Լurer.com-ը, գնահատելով գեներալի անուրանալի դերը հայոց նորօրյա հաղթական ազատամարտում, նրա մեծ ներդրումը բանակաշինության գործում, որպես ԵԿՄ վարչության նախագահ՝ այսօրվա գործունեությունը' ուղղված ազատամարտիկների, զոհվածների եւ վիրավորների իրավունքների պաշտպանությանը, հիմնախնդիրների լուծմանը, երիտասարդ եւ պատանի սերնդի ռազմահայրենասիրական դաստիարակությանը, ջերմորեն շնորհավորում է Արցախի հերոսին՝ ծննդյան տարեդարձի կապակցությամբ: Մաղթում ենք, որպեսզի նա դեռ երկար տարիներ իր կարողությունները ի սպաս դնի Հայաստանի և Արցախի հզորացմանը, հայ ազգի առաջընթացին: Տարեդարձի օրը նաեւ մի փոքրիկ հարցազրույց ենք ունեցել Մանվել Գրիգորյանի հետ:

-Պարոն Գրիգորյան, հուլիսի 19-ին ԼՂՀ-ում նախագահական ընտրություններն են: Ի՞նչ դիրքորոշում ունի ԵԿՄ-ն:
Մենք հանգիստ ենք ու վստահ, որ Արցախի ժողովուրդը ճիշտ ընտրություն կկատարի: ԼՂՀ-ն անկախ պետություն է, ունի ժողովրդավարության առավել բարձր աստիճան, քան Ադրբեջանը: Այնպես որ, իմաստուն որոշումը կկայացվի: Հատկապես, որ շատ բարդ էլ չէ կողմնորոշվելը: Բակո Սահակյանն աշխատանքում ապացուցել է, որ լավ առաջնորդ է, որ նվիրված է ԼՂՀ կայացման եւ միջազգային ճանաչման գործին:

-Իսկ ինչպե՞ս եք գնահատում իրավիճակը հայ-ադրբեջանական շփման գծում: Կա՞ պատերազմի վերսկսման հավանականություն:
Մենք պետք է միշտ պատրաստ լինենք պատերազմի, պետք է ի նկատի ունենանք, որ ցանկացած պահի թուրքը կարող է սադրանքի դիմել: Չնայած, եթե խելացի լինեն, այսօր ադրբեջանցիները ռազմական գործողությունների չեն դիմի: Նրանք լավ գիտեն, որ եթե սկսեցին, այս կանգամ կարող է ոչ թե հրադադար, այլ անվերապահ կապիտուլյացիա պարտադրենք: Մեր ժողովուրդը պետք է միասնական լինի, որպեսզի արտաքին վտանգին միասնաբար դիմակայի:

-Ամեն տարի օգոստոսին ուխտագնացություն եք կազմակերպում դեպի Արցախ: Այս տարի և՞ս մեկնելու եք: Եթե այո, ո՞րն է այդ միջոցառման նպատակը:
Պարտադիր լինելու ենք Արցախի բոլոր վարչական շրջաններում: Ուխտագնացությունը սկսվում է մայիսի 28-ին՝ Սարդարապատից, անցնում է ՀՀ բոլոր մարզերով, բոլոր սահմանամերձ բնակավայրերով եւ ավարտվում Արցախ աշխարհում: Մենք մարտական ընկերներին հանդիպելու, պատերազմական օրերը հիշելու առիթ ենք տալիս, այցելում ենք նաեւ զոհված ընկերների հիշատակին նրանց զոհվելու վայրերում կանգնեցված հուշարձաններին: Երկրապահական ուխտագնացությունները նպաստում են նաեւ սահմանի բնակչի ոգու բարձրացմանը: Սահմանի բնակիչը սահմանապահ է, նա պետք է ամեն վայրկյան զգա, որ մենակ չէ: Ուխտագնացությունը լինելու է, ձեզ էլ հրավիրում ենք մասնակցելու, սեփական աչքերով տեսնելու, թե ինչ ոգեւորություն է տալիս, ինչ լիցքեր է հաղորդում սահմանի բնակչին այն: