«Հայկական Ժամանակ». Կրճատվել է հաշմանդամ ազատամարտիկների բազային թոշակը

Թերթի տեղեկություններով, վերջին ամիսների ընթացքում կրճատվել է հաշմանդամ ազատամարտիկների բազային թոշակը: Այն էլ միանգամից կիսով չափ' շուրջ 55 հազար դրամից դառնալով շուրջ 27 հազար դրամ:

Իհարկե, ազատամարտիկներին վճարվող թոշակի ընդհանուր չափը չի փոխվել ու չի կրճատվել, և նրանք ամեն ամիս միեւնույն գումարն են ստանում: Պարզապես մեր պետությունը դիմել է փոքրիկ խորամանկության, որպեսզի առաջիկայում հնարավորություն լինի բազային թոշակի իրականում փոքր բարձրացում անել, բայց հայտարարել շատ ավելի մեծ թիվ: Իսկ հատկապես նախընտրական շրջանում մեր իշխանությունները նման «շռայլության» դրսևորումների կարիքը հաստատ կունենան: Այսպես, օրինակ, ենթադրենք, որ ընտրություններից առաջ մեր սրտացավ իշխանությունները կարող են հայտարարել, թե ազատամարտիկների բազային թոշակը բարձրացնելու են 10 տոկոսով: Բայց եթե 55 հազարի դեպքում այդ 10 տոկոս հավելումը պետք է 5 հազար 500 դրամ կազմեր, ապա 27 հազարի դեպքում արդեն դա ընդամենը 2 հազար 700 դրամ է լինելու: Այնինչ, բազային թոշակը չկրճատելու դեպքում հնարավոր կլիներ խոսել թոշակի 5 տոկոս բարձրացման մասին միայն: Ինչևէ: Այս խնդրի վերաբերյալ թերթը պարզաբանում է խնդրել ՀՀ պաշտպանության նախարարությունից' գրավոր հարցում ուղարկելով:

Նախարարության տեղեկատվության և հասարակայնության հետ կապերի վարչության պետ Վարդան Ավետիսյանից հարցումն ուղարկելուց հինգ օր անց թերթը ստացել է ընդամենը հետևյալ պատասխանը. «Ձեր հարցմանն ի պատասխան տեղեկացնում եմ, որ հարցման մեջ նշված տեղեկությունները տրամադրելու համար լրացուցիչ ուսումնասիրության անհրաժեշտություն կա: Ըստ այդմ' հարցման պատասխանը կտրամադրվի ՀՀ օրենսդրությամբ սահմանված ժամկետներում»: Ասել է թե' պատասխան կլինի մեկ ամսվա ընթացքում: