«Լավագույն» ավանդույթները շարունակվում են

Վերլուծական 23 Փետրվար, 2019 19:00

Այս օրերին Առողջապահության նախարարությունում 2019-ի պետպատվերի պայմանագրերն են կնքում: Հետաքրքիր է, թե Արսեն Թորոսյանն ինչպես է պատրաստվում կազմակերպել «անվճար եւ արտոնյալ պայմաններով բուժօգնությունը»:

Սկզբում հայտնի դարձավ, որ ամենամեծ պետպատվերը նախարարը տվել է ոչ ավել, ոչ պակաս՝ նախկին իշխանության ֆինանսական կտուրը համարվող Սամվել Ալեքսանյանի ԲԿ-ին, դա էլ դեռ քիչ էր, հեղափոխական նախարարը որոշել է գնալ իր նախորդի՝ Լևոն Ալթունյանի հետքերով և վերոնշյալ պետպատվերի «չալաղաջ մասը» բաժանել խնամի-ծանոթ-բարեկամներին: Խոսքը ՄԻԲՍ կենտրոնի մասին է, որին հատկացված պետպատվերի փաթեթը զգալիորեն աճել է, իսկ ուշագրավն այն է, որ այս կենտրոնի տնօրենը Թորոսյանի կինն է: Ժամանակին էլ Ալթունյանն ավելացրեց իր սեփական ԲԿ-ի պետպատվերի փաթեթը, ինչը չվրիպեց երեկվա ընդդիմադիր, այսօրվա իշխանավորների ուշադրությունից, Ալթունյանին գամեցին «անարգանքի սյունին» և մեղադրեցին պաշտոնեական դիրքի չարաշահման մեջ:

Իսկ այժմ կարծես թե ամեն ինչ նորմալ է և հասարակությունն այլևս սուր կերպով չի արձագանքում նախկին իշխանությունների գործելաոճի բացահայտ կրկնօրինակմանը: Իրականում, ո՞րն է Թորոսյանի տարբերությունը Ալթունյանից: Հակածխախոտային արշավը, որն այսօր «վիզ դրած» առաջ է տանում նախարարը, իրականում Ալթունյանի գաղափարն էր, առողջապահական ապահովագրությունը և դաշտում ԱՊՊԱ կազմակերպությունների մենաշնորհի ամրապնդումը՝ նույնպես, Ալթունյանն էլ էր տարատեսակ խորամանկությունների դիմում պետպատվերի բաշխման հարցում և կարծես հեղափոխական թիմի նախարարը, չկարողանալով իր հետ բերել նոր մշակույթ և գործելաոճ, որոշել է նույնությամբ կրկնել իր նախորդի գիծը: Այն PR ակցիան, որը նախարարը կազմակերպեց ինքն իր համար, սոցիալական ցանցերում կարծես թե ավարտվեց. այլևս գործ ունենք թվերի ու փաստերի հետ, որոնք բնավ էլ Թորոսյանի օգտին չեն: