Փաշինյանի «ջոկերը». Արցախում արտահերթ զարգացումներ են սպասվում

Վերլուծական 25 Փետրվար, 2019 19:00

Արցախի Հանրապետությունում եկող տարի ապրիլին սպասվող նախագահական ընտրությունները ժամանակից շուտ հետաքրքրություն են առաջացրել։ Իրավիճակն էլ ավելի ուշագրավ է դարձել այն բանից հետո, երբ ՀՀ նախկին նախագահ Ռոբերտ Քոչարյանը, փաստորեն, հայտ է ներկայացրել Արցախում սպասվող քաղաքական գործընթացներին մասնակցելու համար։ Մինչ օրս Արցախի նախագահական ընտրություններին իրենց մասնակցելու մտադրության մասին հայտարարել են Արցախի նախկին վարչապետ Արայիկ Հարությունյանը, որը խորհրդարանի «Ազատ Հայրենիք» մեծամասնության առաջնորդն է, Արցախի պաշտպանության նախկին նախարար Սամվել Բաբայանը, Արցախի անվտանգության խորհրդի քարտուղար Վիտալի Բալասանյանը և Աշոտ Ղուլյանը: Թեև ընտրություններին մեկ տարի կա, սակայն հիմնական խաղացողները ժամանակից շուտ ներգրավվել են խաղի մեջ և դա որոշակի եզրահանգումների տեղիք է տալիս:

Նախ՝ արհեստական աժիոտաժը կարծես թե նպատակ է հետապնդում ժամանակից շուտ հասնել գործող նախագահ Բակո Սահակյանի հրաժարականին: Պաշտոնական Երևանը, բնականաբար, ունի իր հետաքրքրությունները Արցախում սպասվող գործընթացներում: Նիկոլ Փաշինյանը թեև ոչ բացահայտ, սակայն աջակցում է Սամվել Բաբայանին, ով իր վերջին հարցազրույցներով չի էլ թաքցրել, որ ցանկանում է նախագահական մրցապայքարում ստանալ Փաշինյանի աջակցությունը: Սակայն Բաբայանն ունի լուրջ խնդիր, որը կարող է նրան պարզապես դուրս թողնել այդ մրցավազքից: Խոսքը գրանցման մասին է, որում Բաբայանին մերժում են այն պարզ պատճառով, որ վերջինս չի բավարարում ընտրություններին մասնակցելու համար անհրաժեշտ ցենզերից մեկին՝ այն է՝ վերջին տարիներին չի բնակվել Արցախում: Սակայն, չնայած այս հանգամանքին՝ Բաբայանը չի պատրաստվում հանձնվել և անգամ սահմանադրական բարեփոխումների նպատակով ստորագրահավաք է կազմակերպել: Մինչ այս՝ բազմակողմանի հարձակումների է ենթարկվում այս ընտրապայքարում Բաբայանի հիմնական մրցակիցը՝ Վիտալի Բալասանյանը, ով թերևս միակ գործիչն է վերը նշվածներից, որ կարող է խառնել պաշտոնական Երևանի խաղաքարտերը: Այդ իսկ պատճառով՝ Բալասանյանին վերջերս թիրախավորում են Սասնա Ծռերով, հիշեցնելով Սերժ Սարգսյանի հետ վաղեմի համագործակցությունը: Ինչ վերաբերվում է վերջին ռեալ խաղացողին այս գործընթացում՝ ապա դա Արայիկ Հարությունյանն է, ով վերջին օրերին ոչ երկիմաստ մեսիջներ է հղում ՀՀ իշխանություններին, գուցե ցանկանալով օգտվել Բաբայանի շուրջ ստեղծված իրավիճակից և դառնալ Փաշինյանի ջոկերը:

Ինչևէ, ժամանակը ցույց կտա, թե ում վրա կանգ կառնի ՀՀ իշխանությունների ընտրությունը: Մի բան, սակայն, ակնհայտ է՝ Հայաստանն իր ուրույն շահն ունի Արցախում ծավալվող խմորումներում: