ՀԴՄ կտրոն ուզելը քիչ է տնտեսական հեղափոխություն անելու համար. Գարեգին Նուշիկյան

ԼՈՒՐԵՐ.com-ը հարուստների ունեզրկման, ներդրումների, տնտեսական զարգացման ծրագրերի և ներքաղաքական մի շարք այլ հարցերի շուրջ զրուցել է ՀՀԿ խմբակցության նախկին պատգամավոր, գործարար Գարեգին Նուշիկյանի հետ: 

Պարո՛ն Նուշիկյան, «Իմ Քայլը» դաշինքի պատգամավոր Հովիկ Աղազարյանն օրերս հայտարարեց, որ խոշոր գործարարներին և մեծահարուստներին պետք է 70 տոկոսով ունեզրկել, որքանո՞վ է սա իրատեսական:

- Ես դրան լուրջ չեմ վերաբերվում և չեմ կարծում, որ կառավարությունը նման անլուրջ մոտեցում կարող է ցուցաբերել այդ հարցին: 

Մասնագետները հարուստներին ունեզրկելու առումով մի շարք ռիսկեր են տեսնում, դո՞ւք ինչ կասեք:

-Ինչ է նշանակում 70%-ը պետք է վերադարձնել, ո՞վ է այդ հաշվարկն արել և ինչի՞ հիման վրա: Ինչպե՞ս կարելի է սա տարածել բոլորի վրա, և ի վերջո՝ ինչո՞ւ են գործարար աշխարհին վարկաբեկում այս քայլով: Ի՞նչ է՝ ամբողջ գործարար աշխարհը գող ու ավազա՞կ են:

Ըստ Ձեզ՝ սա կարո՞ղ է ռիսկի տակ դնել նաև Հայաստան եկող մի շարք հնարավոր ներդրումները, կխոչընդոտե՞ն գործարարների ներդրումային ծրագրերին, աշխատաշուկայի ընդլայնմանը:

-Միանշանակ, դրանք ևս կան: Օրինակ՝ վաղն ինչ-որ մեը եթե ցանկանա գալ և ներդրումներ անել, ապա պետք է դնեն նրա փողերը հաշվե՞ն, իմանալու համար՝ որտեղից ու ինչպես է արել: Կարծում եմ, որ շատ զգույշ է պետք լինել հայտարարություններ անելիս, քանի որ իրենց ցանկացած խոսք կարող է նմանատիպ արձագանք ունենալ: Ով մեր երկրով հետաքրքրված է և հետևում է այստեղի անցուդարձին, չեմ կարծում, որ իր վրա դրական է  ազդելու այս հայտարարությունն ու դրա շուրջ ծավալվող քննարկումները: Հիմա մենք ամբողջ աշխարհով ընկած՝ ներդրող ենք ման գալիս, նրանք այս հայտարարությունները լսելիս այնքան էլ վստահաբար չեն գործի: Ինչ վերաբերվում է տեղի ներդրողներին, ապա նրանք էլ մտածելու մի շարք բաներ կունենան այս թեմայի վերաբերյալ՝ ներդրումներ անել, թե ոչ: Եթե մարդը ներդրում անելուց հետո պետք է մտածի, թե ինչպես գլուխն ազատի ավելորդ ստուգումներից, նա էլ իր անդարդ գլուխը ցավի տակ չի դնի, պետք է զգույշ լինել արտահայտությունների մեջ:

Պարո՛ն Նուշիկյան, Դուք ևս գործարար եք և նախաձեռնել եք «Դալմայի այգիներում» զվարճանքի և ժամանցի կենտրոն կառուցել, աշխատատեղեր բացել., ունեզրկելու օրինագիծն ուժի մեջ մտնելուց հետո հնարավո՞ր է Դուք ևս մտավախություն ունենաք:

-Ես ինչու՞ պետք է ունենամ մտավախություն, քանի որ շահույթով աշխատող հիմնարկ է իմ հիմնարկը, որտեղ ամեն ինչ թափանցիկ կերպով երևում է:

Խոսենք տնտեսության զարգացման մասին. տեսեք՝ վարչապետ Փաշինյանը հայտարարում է, որ տեղի է ունենալու տնտեսական հեղափոխություն: Անցնող 10 ամիսներին նայելով՝ ի՞նչ եք կարծում, հույս կա՞, որ ներկայիս իշխանության օրոք տնտեսության ոլորտում վերելք կապրենք:

-Շանսեր, իհարկե, կան: Դեռ ինչ-որ լուրջ քայլեր չեմ տեսնում, դա պետք է արվի կոնկրետ գործնական քայլերով, որոշ տնտեսական նախաձեռնություններով, դրույթների փոփոխություններով: Դե, 10 ամիս չի անցել, նոր են ընտրությունները եղել:

Ընտրություններն իրենց հերթին, նրանք դեռ ամռանն էին ներկայացրել ժամանակավոր ծրագիրը և, ինչպես անընդհատ շեշտում են, իրագործել են դրանում առկա դրույթների մեծ մասը:

-Որոշակի բաներ փոխվել են, իհարկե, դեպի դրականը: Կոռուպցիան, կաշառակերությունը, որոնք կարևոր են:

Վերացե՞լ են:

-Դե, չեմ ասի, որ վերացել են, բայց զգալիորեն և տեսանելիորեն վերացել են: Թե վաղը-մյուս օրը ոնց կլինի, բայց այսօրվանով դա երևում  է: 

Նիկոլ Փաշինյանը հայտարարում է, որ հեղափոխությունը պետք է քաղաքացիներն անեն՝ տնտեսական հեղափոխության ակտիվիստներ դառնալով, իսկ այստեղ կառավարության դերը ո՞րն է:

-Կառավարությունը հենց պետք է ասի, թե ոնց պետք է այդ հեղափոխությունն արվի: ՀԴՄ կտրոն ուզելը քիչ է տվյալ հեղափոխությունն անելու համար: Պիտի ասեն՝ ոնց ու ինչ անել, ինչ է պահանջվում տվյալ քաղաքացուց: Քաղաքացին այժմ մտածում է, որ ինքի իրենից հասանելիքն արդեն արել է՝ իշխանություն է փոխել, քաղաքական այս ուժին, որին և վստահում և հավատում է, հիմա այս կառավարությունն էլ պետք է ասի, թե ինչպես պետք է վարվի ժողովուրդը: Ես իմ մասով անում եմ՝ ներդրումներ, ծրագրեր, բայց լայն մասսա՞ն ինչ անի: 

Վերադառնանք «Դալմայի այգիներում» Ձեր կողմից իրականացվող ծրագրին, որոշ բնապահպաններ բողոքում են, որ ոչ թե պետք է շինարարություններ անել այդ տարածոքում, այլ նախկին այգիների տեսքը վերականգնել, ինչպե՞ս կմեկնաբանեք սա: 

-Նախ, ուզում եմ ասել, որ այդ ծրագիրն անցել է բնապահպանական օրենքով սահմանված բոլոր կարգերով, և մենք հրապարակային լսումներ ենք կազմակերպել, որին մասնակցել են բազմաթիվ ՀԿ-ներ, բնապահպաններ ու իրենց դիտողություններն են արել և ի վերջո դրական եզրակացությունն են տվել: Փարիզում  եղել է Ելիսեյան փողոց, որը «Դալմայի այգիների» պես տեղ էր անհամեմատ ավելի մեծ, բայց այսօր այդ տարածքը համարվում է աշխարհի ամենահայտնի տարածքներից մեկը: Մենք ոչ թե միայն շինություններ ենք կառուցում, այլ նոր այգի ենք կառուցում անմշակ տարածքում: Այդ բնապահպանները սա կապում են գյուղատնտեսության հետ և ասում են, որ մենք խոչընդոտում ենք գյուղատնտեսության զարգացմանը, բայց չեն խոսում երկրի վարելահողերի 30-40% անմշակ հողերի մասին և խոսում են միայն այս մի քանի քառակուսու մասին: Մենք լուրջ այգի ենք սարքում, որից Հանրապետության և տարածաշրջանային մասշտաբով չկա, պետք ա խորանալ, մակերեսայնորեն նայելով և խձորի ու խաղողի օրինակներով պետք չէ դատողություն անել:  

Ծրագրում նշվում է, որ շուրջ 300 աշխատատեղ է բացվելու: 

-Այո, դա դեռ սկզբնական շրջանում, հետագայում 1000-1500 աշխատատեղ է բացվելու: Բա ուրիշ ինչպե՞ս զարգացնենք մեր երկիրը: Մեր երիտասարդությունն այսօր բացի կաֆեներից ուրիշ տեղ չունի ժամանակ անցկացնելու:

Հարցազրույցը՝ Արմինե ՄԻՔԱՅԵԼՅԱՆի