Հրանտ Բագրատյանը՝ գազի թանկացման մասին (տեսանյութ)

Lurer.com-ի զրուցակիցն է Հայ ազգային կոնգրես խմբակցության պատգամավոր, նախկին վարչապետ Հրանտ Բագրատյանը:

- Պարոն Բագրատյան, շատ է խոսվում գազի հնարավոր թանկացման մասին: Դուք որքանո՞վ եք թանկացումն իրատեսական համարում:

- Գազի թանկացումը համարում եմ իրատեսական:

- Գուցե դա իշխանությունների վատ աշխատանքն է: Ինչո՞վ կպայմանավորեք գնի թանկացումը:

- Ես կարծում եմ, որ գազի թանկացման հարցում մեր իշխանություններն ընդհանրապես կապ չպետք է ունենան: Ի վերջո, գազի գինը վերաբերում է ՀայՌուսգազարդին, որը Ռուսաստանից գազ է գնում: Ո՞ւմն է Հայռոuսգազարդը՝ Ռուսաստանինը, ո՞վ է վաճառողը՝ էլի Ռուսաստանը: Մեր Էներգետիկայի նախարարն ի՞նչ է բանակցում` չեմ կարողանում հասկանալ, ինքն ի՞նչ գործ ունի, քիթն ինչո՞ւ է խոթում դրա մեջ:

Ինչ վերաբերում է գազի գնի թանկացմանը, ապա Գազպրոմը գազի մեծածախ գինը թանկացնում է, քանի որ իրավունքն իրենցն է, համակարգն իրենցն է: Ես կարծում եմ, որ մենք ընդհանրապես գազի սակագին չպետք է նույնիսկ սահմանենք, դա կարգավորող հանձնաժողովի գործը չէ:

- Պարոն Բագրատյան, ի՞նչ եք կարծում, թանկացումները կլինեն այս տարվա հոկտեմբերի մեկի՞ց։ Կան կարծիքներ, որ գազը կթանկանա 2013-ի նախագահական ընտրություններից հետո:

- Մեծածախ գնի թանկացումը կարող է ավելի շուտ լինել նախագահական ընտրություններից, եթե մինչև այդ մանրածախ գինը չփոխեն: Ընդհանրապես, հնարավոր է, որ մանրածախ գինն էլ չփոխվի, որովհետև մանրածախ և մեծածախի գների միջև շատ մեծ տարբերություն կա, ՀայՌուսգազարդի շահութաբերությունը շատ մեծ է: Բոլոր դեպքերում գազի գնի թանկացում կլինի, հնարավոր է՝ նախագահականից հետո: Կարծում եմ՝ գազի գնի թանկացման հետ կթանկանան էլեկտրաէներգիայի և մյուս գները:

Ազատուհի Արասխանյան