Այդ մարդուն պետք է ուղարկել հոգեբուժարան՝ բուժվելու

«Շահագրգռվա՞ծ է ՀՀ-ն և իր հասարակությունը, որ իր հարուստները շատ լինեն, խնդիրը սա է, ինչքան շատ հարուստ՝ այնքան լավ»,- այս մասին մեզ հետ զրույցում ասաց ՀԽՍՀ ԳԽ նախկին պատգամավոր Ազատ Արշակյանը՝ անդրադառնալով ԱԺ «Իմ Քայլը» խմբակցության պատգամավոր Հովիկ Աղազարյանի այն հայտարարությանը, թե հարուստներին պետք է 70%-ով ունեզրկել:

Հարուստներին ունեզրկելու, ներքաղաքական մի շարք հարցերի՝ այդ թվում Լևոն Տեր-Պետրոսյանի վերջին հոդվածի շուրջ ծավալվող քննարկումների վերաբերյալ  ԼՈՒՐԵՐ.com-ը զրուցել է Ազատ Արշակյանի հետ:

Պարո՛ն Արշակյան, ինչպե՞ս եք վերաբերում հարուստներին 70%-ով ունեզրկելու առաջարկին:

-Եթե կան մարդիկ, որոնք հարուստներին կամ աղքատներին կողոպտում են, նրանք պետք է քրեական պատասխանատվության ենթարկվեն օրենքով սահմանված կարգով և այդ կողոպտիչներին պետք է փակել: Արդարությունը սա է, որ պետք է գողերին պատժել:

Մասնավոր զրույցում Դուք մի անգամ ասել եք, որ մեծահարուստների նկատմամբ պետք է կիրառել համաներում, և որ նրանք պետք է իրենց կամքով գողացվածը վերդարձնեն, նույն կարծիքի՞ն եք:

-Այո, ովքեր, որ թալան են կատարել, պետք է պատասխանատվության ենթարկվեն: Քանի որ անցումային շրջանում օրենքները հակասական են լինում, ցանկացած ունևոր և չունևոր մարդ օրենքի հետ հակասություն է ունենում: Դա գործարարների մեղքով չի, նրանք մեղավոր չեն, որ օրենքները փոխվում են, և այս հոդվածը հակասում է մյուսին: Մանավանդ, եթե մարդիկ ձեռներեցությամբ են զբաղվում, ձեռներեցները ստիպված են եղել օրենքի բացակայության դեպքում որևէ գործարքի մեջ մտնել իշխանության  հետ: Այսինքն, իշխանության հետ հարկադրված  գործարքի մեջ մտած մարդկանց անպայման ամնիստիայի պետք է ենթարկել: Ստացվում է, որ անցումային շրջանում հարուստները պետք է կուլակաթափության ենթարկվեն, որովհետև օրենքը նրանց թույլ չի տվել հարստանալ, բայց մենք այդ ճանապարհով չպետք է գնանք և կատարելագործենք օրենսդրական դաշտը, որ ավելի շատ մարդիկ օրինական ճանապարհով հարստանան:

Պարո՛ն Արշակյան, եթե պարոն Աղազարյանի առաջարկն ուժի մեջ մտնի, ի՞նչ ռիսկերի կբախվեն գործարար աշխարի ներկայացուցիչները:

-Դա օրենքի ուժ չի կարող ստանալ, ինձ թվում է՝ այդ մարդուն պետք է ուղարկել հոգեբուժարան՝ բուժվելու, այ սա է ռիսկը, որ ճանապարհին որևէ մեկին չկպնի, քանի որ այդ իմաստով կուլակաթափությունն անթույլատրելի է: Սա նաև ներդրողների և բոլոր-բոլորի վրա է վատ անդրադառնալու՝ ունևորից մինչև սոցիալապես անապահովը: Սոցիալապես ամապահովն այլևս ապահովված չի լինի, ռեսուրսներ չեն լինի, հարուստներն իրենց ունեցվածքից բաժին են հանում չունևորների համար, ՀՀ-ն իրավական, սոցիալական և ժողովրդավարական պետություն է, ինչը նշանակում է՝ թոշակառուներին հարուստները պետք է փող տան, և նրանք, ովքեր ասում են, որ հարուստ չպետք է լինի, նրանք թոշակառուին զրկում են գումարից, հաշմանդամներին՝ իրենց ապրուստի միջոցներից: 

Խոսենք նաև Լևոն Տեր-Պետրոսյանի՝ վերջերս հրապարակած հոդվածի մասին: Բոլորն իրենց ընկալած մեսիջների մասին խոսեցին, Ձեզ համար ո՞րն էր ամենակարևոր մեսիջը, ի՞նչ է իրականում ասում ՀՀ առաջին նախագահը:

-Լևոն Տեր-Պետրոսյանի գործունեությունը ՀՀ բոլոր քաղաքացիների վրա մեծ ազդեցություն է թողել, նա չափազանց մեծ դեր է ունեցել Հայաստանի համար, և հիմա նա պարզապես մեղադրանքներին է պատասխանում՝ ասելով. «Ես մեղավոր չեմ, ես մեղք չունեմ, որ ձեզանից որևէ մեկը քաղաքական ծրագիր ունի, որին դուք չեք համակրում, ես մեղք չունեմ, որ Նիկոլ Փաշինյանի գործունեությանը դուք համաձայն չեք», նրա ասածի իմաստը սա է: Նա շատ կոռեկտ բան է գրել և ասել է, որ նա միայն իր արածների համար է պատասխանատու: Նա ասում է. «Ինձ մեղադրեք Հայաստանն անկախ հռչակելու համար, ինձ մեղադրեք Ղարաբաղն ազատագրելու համար», որոնց համար որ նրան մեղադրում են, խոսքը սրա մասին է: Արդարացի է նրա ասածը, քանի որ Նիկոլ Փաշինյանը ՀՀ վարչապետն է, և նա ինքն է իր վրա վերցրել այդ պատասխանատվությունը:

Ըստ Ձեզ՝ Լևոն Տեր- Պետրոսյանն ու Նիկոլ Փաշինյանը քննարկու՞մ են անելիքները, պլանները, ներքաղաքական խնդիրները: Տեր- Պետրոսյանը հոդվածում նշել էր, որ 2012-ից հետո 2 անգամ է հանդիպել Փաշինյանի, ճի՞շտ է արդյոք դա:

-Ես մի բան գիտեմ միայն, որ երկրի բոլոր ղեկավարները միշտ պետք է միմյանց հետ խորհրդակցեն, հանդիպեն, քննարկեն, քանի որ նրանք այդ երկրի ադմինիստրատիվ մտավորականներն են, սխալ կլինի չխորհրդակցելը, դա վատ ավանդույթ է: Պետք է նախագահների, Ազգային ժողովի պատգամավորների և վարչապետների ակումբ լինի՝ քննարկումների և առաջարկների համար: Նրանց դերակատարումը մեծ է: 

Այնուամենայնիվ, չպատասխանեցիք՝ նրանք հանդիպումներ կազմակերպու՞մ են, թե՞ ոչ, կապ կա՞ նրանց միջև:

-Տեր-Պետրոսյանի հայտարարությունից դատելով՝ նրանք չեն հանդիպում, չեն խորհրդակցում: Բայց եթե նրանք չեն հանդիպում՝ շատ վատ է:

Հարցազրույցը՝ Արմինե ՄԻՔԱՅԵԼՅԱՆի