Ինչպես կանդրադառնան ԱԱԾ ձերբակալությունները՝ հեմոդիալիզի շահառուների վրա

Հեմոդիալիզի պարագաների ձեռքբերման համար նախատեսված մրցույթը ժամանակավորապես դադարեցվել է ԱԱԾ կողմից տվյալ մրցույթի մասնակիցների և ՊՎԾ որոշ աշխատակիցների ձերբակալման հետևանքով: 

Հատուկ օպերացիան փաստացի խնդրի առաջ է կանգնեցրել Վանաձոր և «Գրիգոր Լուսավորիչ» ԲԿ-ներին՝ պակասում են հեմոդիալիզի պարագաները: Մասնավորապես, Վանաձոր ԲԿ-ի 60--ից ավելի հիվանդների համար նախատեսված պարագաները նվազում են, սակայն ԲԿ-ի տնօրեն Վահագն Մկրտչյանի խոսքով՝ այժմ խնդիրն այնքան էլ մեծ չէ: Վահագն Մկրտչյանի զրույցը ԼՈՒՐԵՐ.com-ի հետ՝ ներկայացնում ենք ստորև:

Ինչպե՞ս եք խնդիրը կարգավորելու:

-Հիմա մեր հիվանդները որևէ խնդրի առաջ կանգնած չեն, չնայած նրան, որ հայտարարված տենդերները կասեցվել են: Մենք արագացված գնումների տարբերակն ենք ընտրել, և կազմակերպությունները խոստացել են, որ շատ կարճ ժամանակահատվածում պարագաները կուղարկեն մեզ:

Հեմոդիալիզի որքա՞ն պարագա է մնացել ԲԿ-ում և ե՞րբ կհամալրվի նորերով: 

-Մեր հիվանդների համար չեն կրճատվելու այդ պարագաները: Մնացել է այսօրվա ու վաղվա համար նախատեսված պարագաներ, իսկ նոր կազմակերպությունը, որի հետ 1-ամսյա պայմանագիր ենք կնքում (ի դեպ, օրենքը թույլ է տալիս նման պարագայում արագացված մրցույթ կազմակերպել առավելագույնը մեկ ամվսա պարագաներով),  խոստացել է, որ վաղը պարագաները կլինեն ԲԿ-ում: 

Ո՞ր կազմակերպության հետ եք համագործակցում:

-Գերմանական կազմակերպություն է, որը բավականին որակյալ ապրանքներով է ապահովում կենտրոնը: Ամենակարևորն այն է, որ բավականին բարձր՝ 100%-ոց որակով ապարատներ են  տրամադրում: Ես մեկ ամիս է, ինչ այս ԲԿ-ի տնօրենի ժամանակավոր պաշտոնակատարն եմ և մանրամասն տիապետում եմ խնդրին: Հավելեմ նաև, որ մեզ համար բոլորովին նշանակություն չունի, թե որ կազմակերպությունն է մեզ տեխնիկա և ապրանքներ մատակարարում, կարևորը՝ պետք է լինի բարձր որակի և պաշտոնական երաշխիք պետք է տրամադրեն: Մեզ համար միայն պետք է որակյալ ապրանք, թե հիմա դա կբերի այս ՍՊԸ-ն, թե այն ԱՁ-ն՝ մեզ համար նշանակություն չունի:

Հիշեցնենք, որ քիչ առաջ ԱԱԾ-ն պաշտոնական հաղորդագրությամբ պարզաբանեց օրերս ձերբակալված ՊՎԾ և այլ աշխատակիցների ձերբակալման դեպքերը: 

Արմիենե ՄԻՔԱՅԵԼՅԱՆ