Պայմանավորվածությո՞ւն է խախտվել

Վերլուծական 2 Մարտ, 2019 20:00

ՀՀ երրորդ նախագահ Սերժ Սարգսյանի եղբայրը կրկին հայտնվել է իրավապահ համակարգի ուշադրության կենտրոնում: Երեկ տեղեկատվություն տարածվեց, որ Ազգային անվտանգության ծառայությունը մեղադրանք է առաջադրել Ալեքսանդր Սարգսյանին՝ առանձնապես խոշոր չափերի խարդախության համար: Այսօր էլ արդեն, ԱԱԾ-ից հայտնել են, որ Սարգսյանի խափանման միջոց է ընտրվել չհեռանալու մասին ստորագրությունը: Այս պատմության մեջ հետաքրքիրն այն է, որ մեղադրանքի ներկայացումը համընկավ տխրահռչակ «Սեքյուրիթի դրիմ» ընկերության տնօրենի՝ ընկերության հիմնադիրների դեմ ցուցմունք տալու հետ: Որպես ընկերության հիմնադիր՝ մշտապես էլ հոլովվել է Ալեքսանդր Սարգսյանի անունը, անգամ Նիկոլ Փաշինյանը հեղափոխության օրերին ակցիաներից մեկը, որը նվիրված էր արագաչափերին՝ անվանեց «անտիսաշիկ», այսպիսով արագաչափերի բիզնեսն ուղղակիորեն կապելով Սերժ Սարգսյանի եղբոր անվան հետ:

Սակայն հեղափոխությունից հետո հետաքրքիր փոփոխություններ են նկատվում իշխանության եկած ուժի հռետորաբանության մեջ: Մեկ անգամ չէ, որ իշխանության ներկայացուցիչները փորձել են մաքրել Ալեքսանդր Սարգսյանի անունը արագաչափերի բիզնեսից, հայտարարելով, որ նա երբեք էլ նման բիզնես չի ունեցել: Դա էլ ավելի տարակուսելի է, քանի որ ամենայն հավանականությամբ՝ Սարգսյանին ներկայացված մեղադրանքը հենց «Սեքյուրիթի դրիմ»-ի գործով է: Ստացվում է՝ այս ողջ ընթացքում գործել է ստվերային պայմանավորվածություն, այն է՝ Ալեքսանդր Սարգսյանը մուծվում է (միայն թե հասկանալի չէ՝ բյուջե՞, թե՞ ինչ-որ մեկի գրպանը), իսկ իշխանությունները երաշխավորում են վերջինիս ազատության մեջ գտնվելը:

Այսօր, սակայն, կարծես թե պայմանավորվածություններ են խախտվել, միայն թե հասկանալի չէ՝ ում կողմից: Արդյո՞ք իշխանություններն են ցանկանում նոր շոու կազմակերպել և հավելյալ գումարներ պոկել Ալեքսանդր Սարգսյանից՝ մեկ անգամ ևս հուզական ֆոն ստեղծելով և հոլովելով Սերժ Սարգսյանի եղբոր գործոնը, թե՞ Սարգսյանն ինքն է հասկացել, որ իր դեմ հիմնավոր մեղադրանք այդպես էլ չեն ներկայացրել և որոշել է վճարելով պարտքը՝ դուրս գալ խաղից: Բնական է, որ երկրորդ դեպքում իշխանությունները նորից պետք է գտնեին Սարգսյանին պատին դեմ տալու միջոց, ինչպիսին էլ հանդիսացավ «Սեքյուրիթի դրիմ»-ի տնօրենի ցուցմունքը՝ ճիշտ ժամանակին, ճիշտ վայրում: