Սարգսյանին ու Փաշինյանին միավորող «կախարդական փայտիկի» տեղը հայտնի է

Վերլուծական 2 Մարտ, 2019 21:00

Արդեն 20 տարի կլինի, որ բոլորը միաբերան հայտարարում են, որ Ազգային վիճակագրական ծառայությունը թվեր է նկարում, բայց չգիտես ինչու՝ բոլորը հիմնվում են այդ թվերի վրա: Մասնագետները նշում են, որ ԱՎԾ-ն ոչ միայն «նկարելու» հետ սեր ունի, այլ նաև սխալ մեթոդաբանությամբ է հաշվարկում տվյալները: Իսկ դա նշանակում է, որ մենք շատ մեծ ցանկության դեպքում էլ չենք կարող այդ տվյալներով հասկանալ տնտեսության իրական վիճակը:

Հայաստանում տեղի ունեցած հեղափոխությունից հետո մի շարք պաշտոնյաներ պահպանեցին իրենց պաշտոնները: Նրանց թվում էր նաև ազգային վիճակագրության պետ Ստեփան Մնացականյանը, ով, շատերի պնդմամբ՝ վերանշանակվել է իր մասնագիտական որակներից ելնելով:

Սակայն այդ նույն որակները, որոնց շնորհիվ Մնացականյանը պահպանել է իր աթոռը, ժամանակին ներկայիս իշխանությունների, իսկ այն ժամանակ՝ դեռ շարքային ընդդիմադիրների կողմից անվանվել են թվանկարչություն: Հետևաբար, հարց է ծագում՝ Նոր Հայաստանում Փաշինյանի ինչի՞ն էր պետք մեր ժամանակների Այվազովսկին՝ եթե վարչապետը և իր թիմը խոստացել են, նույնիսկ հրապարակայնորեն երդվել են երբեք չմանիպուլացնել թվերն ու վիճակագրությունը: Արդարության համար նշենք, որ հետհեղափոխական Հայաստանի առաջին մի քանի ամիսների վիճակագրական ցուցանիշները քիչ թե շատ արտացոլում էին երկրում առկա սոցիալ-տնտեսական հիմնական դինամիկան, սակայն այսօր արդեն ականատես ենք լինում դրվագների, որոնք ստիպում են մտածել, որ Մնացականյանը, հանուն Փաշինյանի կաբինետի՝ անցել է իր սիրած գործին՝ ի ցույց դնելով վերը նշված մասնագիտական որակները:

Մասնավորապես, տնտեսական աճն այնպիսի հմայք ունի վերջին վիճակագրական ցուցանիշներում, որ ակամայից թվում է՝ տնտեսական հեղափոխությունն արդեն իսկ կայացած իրողություն է, սակայն պարզից էլ պարզ է, որ իրականությունը, որում այսօր ապրում են մեր քաղաքացիները՝ ներկայացված թվերը, մեղմ ասած, չի արտացոլում: Օրինակ, ինչպե՞ս հասկանալ, որ դեկտեմբերին Հայաստանում 84 տոկոսով ավելի շատ կապիտալ շինարարություն է իրականացվել, քան նոյեմբերին, երբ եղանակային պայմաններն անհամեմատ ավելի բարենպաստ էին։ Այնպիսի տպավորություն է, որ մարդիկ հատուկ սպասել են՝ ցրտերն ընկնեն, որպեսզի սկսեն ամբողջ թափով շինարարական աշխատանքներ կատարել։ Կամ՝ ինչո՞վ է պայմանավորված, որ գյուղատնտեսության ոլորտում արտադրության ծավալները դեկտեմբերին անհամեմատ ավելին են եղել, քան նոյեմբերին։ Նախորդ ամսվա անկումից հետո արդյունաբերությունը հանկարծ կտրուկ աճ է գրանցում, ինչը նույնպես բազմաթիվ հարցեր է առաջացնում, որոնց պատասխանը կարող է տալ միայն ԱՎԾ պետը, ով բացասական ցուցանիշները գրչի մեկ շարժումով դարձնում է վառ և պայծառ՝ հպարտ քաղաքացիների աչքերում: Կարելի է վստահորեն ասել, որ արդեն իսկ պարզ է, թե որն էր Նիկոլ Փաշինյանի կախարդական փայտիկը…