Մարզպետը՝ բարդ ընտրության առջև. էկոլոգիական «դրախտին» կփոխարինի մասնավոր հանքը

Վերլուծական 4 Մարտ, 2019 21:50

Տավուշի նորանշանակ մարզպետը նշանակվելուց օրեր անց հայտարարում էր Տավուշը էկոլոգիական դրախտի վերածելու իր մտադրության մասին: Մի ամիս էլ չի անցել սակայն այսօր արդեն Տավուշում հանք կառուցելու մասին խոսակցություններ են գնում: Պարզապես հանրային արձագանքը այդ ծրագրին սպասվածից ավելի խիստ եղավ, հանրային լսումները ժամանակավորապես կասեցվեցին, սակայն իրավիճակը ավելի շատ նման է ժամանակ շահելու փորձի, քան ՝ հանք կառուցելու գաղափարից վերջնականապես հրաժարվելու:

«ԷՅ ՅՈՒ ԳՐՈՒՊ» ՍՊԸ-ն, որը պետք է Տավուշում հանք կառուցի, հիմնադրվել է 2017 թվականի դեկտեմբերին՝ Կանադայի քաղաքացի Վահագն Գայայանի կողմից։ 2018 թվականին այս ընկերությունը հանրային քննարկումներ է անցկացրել Վազաշենում եւ ստացել համայնքի նախնական համաձայնությունը: Փաստորեն, ըստ էության, հանքը մասնավոր է լինելու՝ պատկանելու է ոչ թե պետությանը կամ համայնքին, այլ ինչ-որ ընկերության: Մետաղական հանքերն անդառնալի վնաս են հասցնում բնական միջավայրին, այդպիսով՝ նաեւ մարդկանց ու կենդանական աշխարհին: Բացի այդ՝ դեռևս լուծված չեն մարզի ջրամբարների խնդիրը: Տավուշի մարզի Ոսկեպար, Կողբագետ, Քարահան, Հախում գետերի ջրերը հոսում են Ադրբեջան, ոռոգում այդ երկրի տարածքները: Ասել է թե՝ վնասից բացի այդ հանքը տավուշցիներին ոչինչ չի տալու:

Ավելորդ է ասել, որ անհրաժեշտ է Տավուշում ոռոգման ջրամբարներ կառուցել եւ ավելացնել մարզի ոռոգելի հողերը, որոնք այժմ 6 հազար հեկտար են կազմում: Եթե հանք կառուցելու ծրագրերը իրականություն դառնան ՝ տավուշցիները ընդհանրապես կմնան առանց ոռոգման ջրի: Թերևս սա ամենահարմար պահն է, երբ մարզպետ Չոբանյանը կարող է և պարտավոր է ապացուցել, որ օրինակ ընտանիքով Երևանից Տավուշ տեղափոխվելը ընդամենը փիառ ակցիա չէ և նա իսկապես մտահոգ է մարզի և մարզի բնակիչների խնդիրներով: Հակառակ դեպքում՝ ստացվում է էկոլոգիական դրախտի փոխարեն Հայաստանի սահմանամերձ գոտին կվերածվի հերթական հանքավայրի՝ մարզպետի անմիջական թողտվության արդյունքում: