Ինչո՞ւ «մերժված Սերժի» ստվերը հանգիստ չի տալիս Փաշինյանի թիմին.

Վերլուծական 5 Մարտ, 2019 19:30

ԱԺ նախկին փոխխոսնակ Արփինե Հովհաննիսյանը իր ֆեյսբուքյան էջում հրապարակել է փոխվարչապետ Մհեր Գրիգորյանի և ֆինանսների նախարար Ատոմ Ջանջուղազյանի՝ վարչապետ Փաշինյանին ուղղված գրությունը, որով ներկայացվում է պետծառայողների օպտիմալացման ընթացիկ վիճակը, ըստ որի՝ մոտ 10 հազար հավելյալ արդյունք չստեղծող հանրային ծառայողներ հնարավոր է դառնան գործազուրկ, և «դրանից շահում է հայոց պետականությունը»:

Հովհաննիսյանը այս քայլը անպատասխան չմնաց, իշխանության ներկայացուցիչները որոշեցին մեկնաբանել գրությունը, սակայն վստահորեն կարող ենք ասել, որ սա այն դեպքն է, երբ լռելը ավելի օգտակար կարող էր լինել: ՔՊ-ական Վարազդատ Կարապետյանը մասնավորապես հայտարարել է, որ «Խնդիրը այդ մարդկանց կրճատելը չէ, այլ պետական կառավարման համակարգի արդյունավետության բարձրացումը: Եվ եթե այդ ճանապարհին պետք է մարդիկ կրճատվեն, ուրեմն դա անհրաժեշտ քայլ է»: Ավելին, պատգամավորը վստահ է, որ այդ 10 հազար մարդը զոհն է նախկին գործընթացի. «Այսինքն՝ տարիներ շարունակ մենք ուռճացրել ենք պետական կառավարման համակարգը և այնտեղ տեղավորել հազարավոր մարդկանց, և այդ մարդիկ զրկվել են սովորական, անկեղծ մասնագիտություն ստանալու և մասնավոր հատվածում աշխատելու հնարավորությունից և փոխարենը կեղծիքի միջոցով դարձել են պետական կառավարման համակարգի մաս»:- ասել է Կարապետյանը լրագրողների հետ զրույցում:

Ինչպես տեսնում ենք, ամեն ինչում մեղավոր են նախկին իշխանությունները թեզը շարունակում է թրենդային լինել նորերի մոտ: Ամեն ինչում մեղավոր է Սերժ Սարգսյանն ու ՀՀԿ-ն, նրանց ցանածի պտուղներն են այսօր անձնազոհաբար հավաքում: Իհարկե, նախորդ իշխանություններն էլ էին դիմում կրճատումների, սակայն ոչ այս մաշտաբներով, շատ ավելի հաշվարկված, գուցե դա է պատճառը, որ 10 հազար մարդ գործազուրկ չի դարձել Սերժ Սարգսյանի օրոք, փոխարենը դառնում է Նոր Հայաստանում Փաշինյանի օրոք: Սլաքները ուղղելով նախորդ իշխանության դեմ, նորերը չեն հասկանում մի պարզ բան․ լավ, եթե պետական կառավարման համակարգում ստրկատիրական կարգեր էին , մարդկանց էլ զոռբայությամբ կտրելով մասնավոր սեկտորից ստիպում էին քոռ կոպեկի դիմաց աշխատել պետական հատվածում, ապա ինչո՞ւ են այսօր այդ մարդիկ փողոց դուրս եկել և պահանջում պահպանել իրենց չարյաց աշխատանքը:

Չէ որ պետք է լիներ հակառակը, նրանք պետք է ողջունեին նոր իշխանություններին իբրև ազատարարների, որոնք շուրջ 10 հազար հոգու ազատեցին պետական համակարգի լծից: Հայաստանում պակասեց 10 հազար ստրուկ, փոխարենը ավելացավ 10 հազար գործազուրկ , և արդյո՞ք նույն Վարազդատ Կարապետյանը վստահ է, որ մասնավոր սեկտորում այս մարդկանց գրկաբաց են ընդունելու: Կամ գուցե չի՞ գիտակցում, որ այսօր փողոց դուրս եկողները բողոքելու են ոչ թե Սերժ Սարգսյանից, քանի որ նրան արդեն մերժել պրծել են, այլ իրենց ազատման հրամանները ստորագրող Փաշինյանից ու իր թիմից: Լավ չէ, երբ պետական շահը չի տարբերվում պետական դավաճանությունից…