Փաշինյանի արդարադատության «կարապի երգը»

Ազգային անվտանգության ծառայությունը Սերժ Սարգսյանի եղբորը՝ Ալեքսանդր Սարգսյանին թույլատրել է որոշ ժամանակով հեռանալ Հայաստանից: Հիշեցնենք, որ ավելի վաղ Ալեքսանդր Սարգսյանը ԱԱԾ-ին երկրից չհեռանալու մասին ստորագրություն էր տվել: Սակայն պարզից էլ պարզ է, որ եթե Սարգսյանի նկատմամբ կիրառված խափանման միջոցը չի փոխվել, ապա նման թույլտվությունը ապօրինի է: Չի բացառվում նաև, որ նման որոշման համար հիմք են հանդիսացել Սարգսյանի մուծված փողերը, որից հետո նրան թույլ են տվել հեռանալ՝ միանալ հետախուզման մեջ գտնվող որդուն՝ Ֆրանկլին Գոնսալեսին, նույն ինքը Նարեկ Սարգսյանը:

Ի դեպ, երբ պատկան մարմինները փորձում են հերքել Սարգսյանների նկատմամբ խտրական վերաբերմունքը, տեղին է հիշել, օրինակ, Սամվել Մայրապետյանի դեպքը, երբ վերջինիս թույլ տվեցին հեռանալ երկրից միայն ՄԻԵԴ՝ մեր դատական համակարգը խայտառակող որոշումից հետո: Կամ ինչու ոչ՝ նաև ՊՆ նախկին ղեկավար Սեյրան Օհանյանի դեպքը, երբ վերջինս ցանկանում էր մեկնել Վրաստան՝ ընկերոջ՝ Վրաստանի պաշտպանության նախկին նախարարի ծննդյան արարողությանը մասնակցելու, բայց Բագրատաշենում սահմանապահները կանգնեցրել էին նրան եւ արգելել ելքը երկրից։

Այդ ժամանակ նա որեւէ դատավարական կարգավիճակ չուներ։ Սեյրան Օհանյանին մեղադրանք է առաջադրվել միայն հունվարի սկզբին: Հասկանալի չէ, թե ինչ հիմքով է ՀՔԾ-ն արգելել ՊՆ նախկին նախարարին լքել Հայաստանի տարածքը: Հասկանալի չէ նաև, թե ինչ հիմքով է Սաշիկ Սարգսյանին տրվել նման արտոնություն: Ի՞նչ է սա, եթե ոչ խտրական վերաբերմունք՝ «մուծվածների» հանդեպ: Արդյո՞ք մեր պատկան մարմինները չունեն որևէ մտավախություն, որ Սաշիկ Սարգսյանը Եվրոպայում կմիանա իր որդուն և նրանց արտահանձման հարցը կմնա ավելի լավ ժամանակների: Կարևորը՝ գումարներն արդեն վերադարձվել են, ինչը ինքը՝ Սարգսյանը անվանել է նվիրատվություն: Ու եթե «գողության» անունը դնում ենք «նվիրատվություն», ստացվում է, որ պետությունը նույնպես հանցակից է գողության մեջ ու այժմ ամեն բան լղոզելով, փորձում է երկու կողմերի հետ էլ լավամարդ խաղալ: Գուցե Սարգսյանի Իսպանիայում հայտնվել էլ այդ խաղի մի մասն է…