«Չորրորդ ինքնիշխանություն». Միկա Բաղդասարովն ընդդեմ «ՉԻ»-ի դատական նիստը՝ երկուշաբթի

«Երկուշաբթի օրը՝ նոյեմբերի 28-ին՝ ժամը 11:30-ին, Կենտրոն և Նորք Մարաշ վարչական շրջանների ընդհանուր իրավասության դատարանում կկայանա նախնական դատական նիստ՝ օլիգարխ Միկա Բաղդասարովին պատկանող «Արմավիա» ավիաընկերությունն ընդդեմ «Չորրորդ ինքնիշխանություն» թերթի:

Մեկ դատական նիստ՝ դատավոր Ռուբեն Ափինյանի գլխավորությամբ, արդեն կայացել է: Հիշեցնենք՝ այդ նիստին հայցվոր կողմի ներկայացուցիչ Արտավազդ Պետրոսյանը կարճ պատասխանել է, որ օրաթերթն իր հրապարակումով արատավորել է «Արմավիա» ավիաընկերության գործարար համբավը: Միկա Բաղդասարովին պատկանող ընկերությունը «Չորրորդ ինքնիշխանություն» օրաթերթից պահանջում է հերքել սեպտեմբերի 15-ին հրապարակած տեղեկությունները և 2 մլն դրամ փոխհատուցել ընկերության գործարար համբավի արատավորման դիմաց: «ՉԻ»-ն Epress.am կայքից լուր է արտատպել, համաձայն որի՝ Մոլդովայի ազգային բանակի հրամանատարը՝ գեներալ Յուրի Դոմինիկը, հայտարարել էր, թե հայկական ավիաընկերությունները զենք են մատակարարում Լիբիային: Հայաստանի քաղաքացիական ավիացիայի մամլո քարտուղարը «Epress.am» կայքի լրագրողին ասել էր, թե այդ մասին պարզաբանում կարող է տալ «Արմավիան», որովհետև այն մոնոպոլիստ է: Ի դեպ, «Epress.am»-ը լուրի մասին գրելիս իր հերթին հղում էր արել ռուսական և արտասահմանյան լրատվամիջոցների: Իսկ «Արմավիա» ընկերության մամուլի քարտուղար Նանա Ավետիսովան հեռախոսազանգին չէր պատասխանել: Նույն բովանդակությամբ լուրը արտատպվել էր նաև «ՉԻ»-ում»,- գրում է թերթը: