Ջհանգիրյանը «պաշտոնավարում է» նաև նոր Հայաստանում

Վերլուծական 9 Մարտ, 2019 18:00

ՀՀ գլխավոր դատախազի նախկին տեղակալ, նախկին զինդատախազ Գագիկ Ջհանգիրյանի՝ վերջին շրջանի հրապարակային ելույթներն ու տված հարցազրույցներն այլ բան, քան մարգարեություն՝ չես անվանի: Ամեն անգամ, երբ Ջհանգիրյանը հանդես է գալիս որևէ հայտարարությամբ կապված Մարտի 1-ի գործի և ընթացող դատավարության հետ, ընդամենը օրեր անց պատկան մարմինները պաշտոնապես հաստատում են Ջհանգիրյանի առաջ քաշած կարծիքն ու տեսակետները, և զարմանալիորեն, նրա հնչեցրած բոլոր գնահատականները դառնում են պաշտոնական քրոնիկոնի մի մաս: Պարզ օրինակ բերենք. Մարտի 1-ի զոհերի հիշատակին նվիրված երթի ժամանակ Գագիկ Ջհանգիրյանը հայտարարեց. «Մտածում եմ, որ նախաքննությունը սպանությունների, այլ անձանց օժանդակությունների մասով կշարունակվի։ Մարտի 1-ի գործով շուտով ականատես կլինենք նոր բացահայտումների և հաղորդումների»։ Դրանից բառացիորեն երկու օր անց ՀՔԾ տարածած հաղորդագրությունից պարզ դարձավ, որ վերոնշյալ գործի շրջանակներում հարցաքննության է հրավիրվել նախկին արտգործնախարար Վարդան Օսկանյանը:

Այնհուհետև Ջհանգիրյանը հայտարարում է, որ իր կարծիքով, Քոչարյանի մեղադրանքը կընդլայնվի, կաշառքի, փողերի լվացման մեղադրանքներ կավելանան: Այնուհետև ՀՀ 2–րդ նախագահ Ռոբերտ Քոչարյանին նոր մեղադրանք է առաջադրվում` խոշոր չափի կաշառք ստանալու հոդվածով: Այսինքն՝ բացի ՀՀ քրեական օրենսգրքի սահմանադրական կարգի տապալմանը վերաբերող 300.1-րդ հոդվածից՝ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափի կաշառք ստանալը, հետևաբար, Ջհանգիրյանն այս դեպքում էլ ճիշտ դուրս եկավ՝ Քոչարյանի մեղադրանքը ընդլայնվեց: Դա էլ բավական չէր, Ջհանգիրյանը շարունակեց պայծառատեսությունը և հայտարարեց, որ Քոչարյանի, Խաչատուրովի և Օհանյանի գործերը կմիանան և առաջիկայում կներկայացվեն դատարան: Փետրվարի 15–ին ՀՔԾ–ն հայտարարեց 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ քննվող քրեական գործով նախաքննության ավարտի մասին: Այս գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Արդյոք այս ամենը զուգադիպությո՞ւն է, թե՞ պարզապես Ջհանգիրյանն ունի իր վստահելի աղբյուրները դատախազությունում, ՀՔԾ-ում: Հնարավոր է՝ ունենա, հաշվի առնելով համակարգի «հին գել» լինելու հանգամանքը, սակայն էլ ավելի հավանական է, որ գլխավոր դատախազությունում իրավիճակ, իսկ ավելի ճիշտ կլինի ասել՝ ասող է փոխվել: Իշխանական կուլիսներում շրջանառվող խոսակցությունների համաձայն՝ «լևոնականները» Նիկոլ Փաշինյանին փորձում են համոզել, որ Գագիկ Ջհանգիրյանը պետք է պաշտոն ստանա, և նա, ամենաքիչը կարող է լինել ՀՀ գլխավոր դատախազ: Դա է պատճառը նաև, որ գործող գլխավոր դատախազ Արթուր Դավթյանը վերջին շրջանում հաճախ է հայտնվում քննադատությունների թիրախում: Տպավորություն է, որ վերջինից ամեն գնով փորձում են ազատվել: Գուցե Դավթյանի դերը գլխավոր դատախազությունում արդեն իսկ զրոյի է հասցված, իսկ կառույցի փաստացի ղեկավարը այլ մարդ է…